Նոյեմբերի 19-ին Թբիլիսիի Մուղնեցոց Սուրբ Գեւորգ գմբեթավոր եկեղեցու փլուզման փաստը վրացական իշխանությունների հանցավոր անգործության օրինաչափ արդյունք եւ երկրի հայ փոքրամասնության նկատմամբ իրականավող խտրական քաղաքականության հերթական դրսեւորում է: Այդ մասին ասված է «Երկիր» միության տարածած հայտարարության մեջ:
«Տարիներ շարունակ միտումնավոր ձգձգելով Վիրահայոց թեմի իրավաբանական անձի կարգավիճակի եւ հայոց եկեղեցիների վերադարձման հարցերի լուծումը՝ Վրաստանի կառավարությունը բացահայտորեն արհամարհում է Վիրահայոց թեմի, Մայր Աթոռ Սուրբ Էջմիածնի, Հայաստանի իշխանությունների, հայաստանյան եւ սփյուռքյան ոչ կառավարական կազմակերպությունների բազմաթիվ դիմումները, ինչպես նաեւ միջազգային կազմակերպությունների, միջազգային իրավապաշտպան կառույցների կոչերն ու հանձնարարականները»,- նշում են հայտարարության հեղինակները:
«Երկիր» միությունն արձանագրել է, որ վրացական իշխանությունների կողմից իրականացվող հայ բնակչության, որպես փոքրամասնություն կարգավիճակից բխող, կենսական խնդիրների անտեսման քաղաքականությունը միմիայն հանգեցնելու է ինչպես վիրահայության, այնպես ել հայության շրջանում հիասթափության եւ դժգոհության տրամադրությունների ուժեղացմանը, ինչը չի կարող իր բացասական ազդեցությունը չունենալ հայ-վրացական հարաբերությունների վրա:
Ի դեպ, վաղը, ժամը 14-ին, Հանրապետության Հրապարակից դեպի ՄԱԿ եւ Վրաստանի դեսպանատուն տեղի է ունենալու բողոքի երթ՝ Հայ Առաքելական Սուրբ Եկեղեցու Վիրահայոց թեմին իրավաբանական կարգավիճակ տալու, հայ եկեղեցիները վերադարձնելու, հայ ժողովրդի մշակութային արժեքները հարգելու ու պահպանելու պահանջով: