ԱԺ եվրոպական ինտեգրման հարցերի մշտական հանձնաժողովի նախագահ Նաիրա Զոհրաբյանը նոյեմբերի 26-ին ընդունել է փաստահավաք առաքելությամբ տարածաշրջան ժամանած Ֆրանսիայի Ազգային ժողովի պատգամավորներ, արտաքին հարաբերությունների հանձնաժողովի անդամներ Քրիստիան Բատային և Ռոլանդ Բլյումին: Հանդիպմանը ներկա է եղել ՀՀ-ում Ֆրանսիայի դեսպանության առաջին խորհրդական Քրիստիան Բեքը:
Ողջունելով եվրոպացի գործընկերներին , տիկին Զոհրաբյանը բարձր է գնահատել հայ-ֆրանսիական քաղաքական, ինչպես նաև` զարգացող տնտեսական հարաբերությունները, ինչի վկայությունն է նաև «Օրանժ» ընկերության մուտքը Հայաստան: Հանդիպման ընթացքում անդրադարձ է եղել հայ-թուրքական հարաբերությունների կարգավորմանը, ԼՂ հակամարտության լուծման խնդրին, այդ հարցում ԵԱՀԿ Մինսկի խմբի շրջանակներում Ֆրանսիայի ներդրած ջանքերին: Ն. Զոհրաբյանը անդրադարձել է ԼՂ խնդրի կարգավորման վերաբերյալ օրերս Ադրբեջանի նախագահ Իլհամ Ալիևի և պաշտպանության նախարար Սաֆար Աբիևի հնչեցրած հայտարարություններին, մեկ անգամ ևս կրկնելով, որ Հայաստանը հակամարտության կարգավորումը տեսնում է ԵԱՀԿ Մինսկի խմբի շրջանակներում` խաղաղ, բանակցային ճանապարհով. «Մենք պատերազմ չենք ուզում, բայց մեզ պատերազմով հնարավոր չէ վախեցնել»,- շեշտել է հանձնաժողովի նախագահը:
Հանդիպման ընթացքում հայ և ֆրանսիացի գործընկերներն անդրադարձել են ԵՄ «Արևելյան գործընկերություն» նախաձեռնությանը և դրա որոշ ծրագրերին միանալու ՌԴ ԱԳ նախարարի հայտարարությանը, ինչը, ըստ Նաիրա Զոհրաբյանի, լավ հիմք է տարածաշրջանային համագործակցության համար:
Կողմերն անդրադարձել են նաև 2008 թվականի նախագահական ընտրություններից հետո տեղի ունեցած իրադարձություններին և ԱԺ մարտիմեկյան դեպքերի ուսումնասիրման նպատակով ստեղծված հանձնաժողովի զեկույցին և դրանում ընդգրկված առաջարկների իրականացումն ուսումնասիրելու նպատակով կատարվող քայլերին:
