«Սիրիայի ընկերները» նաեւ Սիրիական ազգային խորհուրդը ընդունել են որպես վստահության արժանի ընդդիմության ձայն…
Թունիսում փետրվարի 24-ին կայացած «Սիրիայի ընկերների» կոնֆերանսի մասնակիցները բռնությունն անմիջապես դադարեցնելու եւ Բաշար Ասադի վարչակարգի նկատմամբ պատժամիջոցները խստացնելու կոչ են արել: Այդ մասին ասվել է կոնֆերանսի եզրափակիչ հայտարարության մեջ:
Ասադի վարչակարգի դեմ առաջարկվում է կիրառել հետեւյալ պատժամիջոցները. Սիրիական վարչակարգի ներկայացուցիչներին երկրից բացակայելու արգելք, ակտիվների սառեցում, սիրիական նավթի ներկրման դադարեցում, դիվանագիտական հարաբերությունների խզում:
«Սիրիայի ընկերները» նաեւ պայմանավորվել են շարունակել Սիրիայում ծավալվող ՄԱԿ-ի եւ ԱՊԼ-ի համատեղ խաղաղարարական ծրագրի քննարկումը` խնդրի կարգավորման քաղաքական ճանապարհի համար:
«Մենք սիրիական ղեկավարությունից պահանջում ենք հումանիտար կազմակերպություններին ազատ եւ անվտանգ մուտք ապահովել ամենաշատ տուժած շրջաններ, հատկապես` Հոմս», — ասվում է եզրափակիչ փաստաթղթում, գրում է «Ռոսբալտը»:
Ըստ rbc-ի` «Սիրիայի ընկերներից» մեկը` Թունիսի նախագահ Մոնսեֆ Մարզուկին, սիրիական առաջնորդ Բաշար Ասադին առաջարկել է ընտանիքի հետ փախչել երկրից եւ թաքնվել Ռուսաստանում: «Արդարադատութունը չի կատարվի, բայց սիրիացիների կյանքն ավելի կարեւոր է արդարադատությունից», - հայտարարել է նա:
«Սիրիայի ընկերները» նաեւ Սիրիական ազգային խորհուրդը ընդունել են որպես վստահության արժանի ընդդիմության ձայն: Այսպիսով, մի շարք փորձագետների մտավախությունը, որ ՍԱԽ-ն կճանաչվի Սիրիայում միակ լեգիտիմ իշխանություն, դեռեւս չեն արդարացվել: Սակայն, հիշեցնենք, որ ապստամբները, որոնց մոտ հայտնվել են միանգամից 70 արտասամանյան «ընկերներ», արդեն նրանցից զենք են խնդրել: