Լիբիայում դաշնային կառուցվածքի կողմնակիցների բազմահազարանոց հանրահավաքը Բենղազիում մարտի 16-ին հարձակման է ենթարկվել հրացաններով եւ դանակներով զինված դաշնության մի խումբ հակառակորդների կողմից:
Խումբը ներխուժել է ինքնավարության կողմնակիցների ամբոխ եւ կրակ բացել, ցուցարարների շրջանում խուճապ է առաջացել: Ըստ արտակարգ պայմաններում բժշկական օգնություն ցուցաբերողների տվյալների` մեկ մարդ սպանվել է, հինգը` վիրավորվել:
Բացի դրանից` զինված անձինք հարձակվել են տեղական «Լիբիա ալ Ահրար» հեռուսաալիքի խմբագրության շենքի վրա, այդպիսով նրանք ցանկացել են խանգարել նրա թղթակիցներին ցույցը լուսաբանել, հայտնում է «Կոմսոմոլսկայա պրավդան»:
Հիշեցնենք, որ արեւելյան Լիբիայում տոհմերի առաջնորդները եւ ազգային ապստամբների ղեկավարները կողմ են դաշնությանը:
Դաշնային կառուցվածքի հակառակորդները հայտարարում են, որ երկիրը պետք է միասնական մնա:
Rbc-ն նշում է, որ Քիրենաիքիի ինքնավարության նախագիծը նախատեսում է խոշորագույն նավթահորերի անցումը Բենղազիի վերահսկողության ներքո: Դա իր հերթին առաջացնում է Արեւմուտքի երկրների անհանգստությունը, որոնք Տրիպոլիում նոր իշխանությունների հետ պայմանավորվածության խզման մտավախություն ունեն: