«Մոզրով»-ի քարանձավը չի փլուզվել: Այս մասին NEWS.am-ին հայտնեց «Պատմամշակութային արգելոց թանգարանների եւ պատմական միջավայրի պահպանության ծառայություն» ՊՈԱԿ-ի տնօրենի օգնական հասարակայնության հետ կապերի գծով Մարինե Ավանեսյանը:
Նրա փոխանցմամբ` «Պատմշակութային արգելոց-թանգարանների եւ պատմական միջավայրի պահպանության ծառայություն» ՊՈԱԿ-ի ահազանգով ստեղծված աշխատանքային խումբը ՊՈԱԿ-ի մասնաճյուղի երկու պատասխանատու աշխատակիցները, Վայոց Ձորի մարզպետարանի քաղաքաշինության վարչության պետ Ազատ Հովսեփյանը, Եղեգնաձոր քաղաքի գլխավոր ճարտարապետ Սամվել Աղաջանյանը, Եղեգնաձոր քաղաքի գլխավոր ճարտարապետ Արմեն Աղաջանյանը, մարտի 13-ին եղել են տեղում եւ ծանոթացել իրավիճակին: Արդյունքում պարզվել է, որ «Մոզրով»-ի քարանձավը չի փլուզվել: «Նկատի ունենալով հարցի կարեւորությունն եւ հասարակական հնչեղությունը, մարտի 14-ին քարանձավի տարածքում նեղ մասնագիտական ուսումնասիրություն են կատարել նաեւ ՊՈԱԿ-ի հուշարձանների պահպանության բաժնի վարիչ, հնագետ Արտավազդ Զաքյանը եւ Հայաստանի Անձավագիտական կենտրոնի նախագահության անդամ, անձավագետ-անձավախույզ Վահան Տեր-Ղազարյանը: Ուսումնասիրությամբ եւս մեկ անգամ հաստատել են, որ «Մոզրով»-ի քարանձավը չի փլուզվել: Ա.Զաքյանի եւ Վահան Տեր-Ղազարյանի եզրակացությամբ մասնավորապես «քարանձավի անդունդի մուտքի հատվածի կամարի եզրից քարեր են թափվել՝ առաջացնելով հատակի սողք: Խիստ վթարավտանգ վիճակ է ստեղծվել կամարի հատվածում: Սա երկրաբանական ու բնակլիմայական ազդեցության հետեւանք է: Քարանձավի հիմնական ծավալը՝ մոտ 300 մետր վնասված չէ եւ վտանգ չի սպառնում քարայրի ամբողջությանը»:
Ի դեպ, առաջիկայում նախատեսվում է ժամանակավորապես մետաղյա ճաղավանդակներով ամբողջությամբ փակել քարանձավի մուտքը եւ Անձավագիտական կենտրոնի հետ համատեղ իրականացնել «Մոզրով»-ի քարանձավի տեխնիկական, երկրաբանական ուսումնասիրություն:
Նշենք, որ «Չենք լռելու» երիտասարդական նախաձեռնության Վայոց Ձորի ակտիվիստները հայտնել էին, որ փլուզվել է Հայաստանի բնության ամենչքնաղ հուշարձաններից մեկը` հանրահայտ Մոզրովի քարանձավը, որը ՀՀ կառավարության որոշմամբ ընդգրկված է Պատմության եւ մշակույթի անշարժ հուշարձանների պետական ցուցակում: