Արտակարգ դրությունն անցանկալի է ցանկացած պետությունում եւ յուրաքանչյուր մարդու համար: Այս մասին այսօր` մարտի 19-ին, խորհրդարանում «Արտակարգ դրության իրավական կարգի մասին» օրինագծի քննարկման ընթացքում հայտարարել է Հայաստանի արդարադատության նախարար Հրայր Թովմսայանը: Օրենքում փոփոխությունները նախատեսում են ԱԻ-ի դեպքում Զինված ուժերի կիրառման հնարավորությունն այն պայմանով, որ բանակային զորամասերը կկատարեն այն նույն գործառույթները, ինչը որ ոստիկանները:
Ինչպես նշել է խորհրդարանի պետաիրավական հարցերով հանձնաժողովի նախագահ Դավիթ Հարությունյանը, օրինագիծը հիմք չի տալիս կարծելու, որ բանակը կարող է օգտագործվել քաղաքական նպատակներով: «Քաղաքական նպատակներով` ոչ, սահմանադրական կարգուկանոնի պահպանման համար` այո», – վստահեցրել է Հարությունյանը:
Իր հերթին «Ժառանգություն» խմբակցության պատգամավոր Արմեն Մարտիրոսյանը մեջբերել է Հայաստանի ազգային անվտանգության ռազմավարությունը, որում նշվում է, որ Զինված ուժերը նախատեսված են ագրեսիայից պաշտպանվելու համար: Իսկ ագրեսիայի օրենսդրական սահմանումը նախատեսում է միայն արտաքին ագրեսիա: «Ներքինի մասին ոչինչ չի ասվում, հետեւաբար, մեր դիտողություններն արդար են: Իսկ եթե ժողովրդի դժգոհությունը հասնի գագաթնակետի, ապա իշխանությունը չեք պահի անգամ Զինված ուժերի օգնությամբ», – նշել է Մարտիրոսյանը:
Պատասխան ելույթում Հայաստանի հանրապետական կուսակցության խմբակցության ղեկավար Գալուստ Սահակյանը հայտարարել է, որ «արդար պայքարի ելածները չպետք է վախենան, որ հայ օջախում մեծացած զինվորը ձեռք կբարձրացնի իրենց վրա»: «Բանակը կարող է եւ իրավունք ունի ապօրինի զինված խմբավորումների դեմ կռվելու», - նշել է նա:
