«Ալեն-Էլեն» դիսկո ակումբում նռնակ պայթեցրած անձը հայտնաբերվել եւ ձերբակալվել է:
Հիշեցնենք, որ այսօր, մարտի 20-ի գիշերը, ոստիկանության Երեւան քաղաքի վարչության հերթապահ մասում ահազանգ էր ստացվել, որ Աբովյան փողոցի թիվ 3 հասցեում գտնվող «Ալեն-Էլեն» դիսկո-ակումբում նռնակ են պայթեցրել:
Նույն օրը, ժամը 02.50-ին, հիվանդանոցից հաղորդում է ստացվել, որ շնչուղիների այրվածքներով բուժօգնության են տեղափոխվել 7 անձինք:
Ոստիկանության ծառայողների ձեռնարկած օպերատիվ-հետախուզական միջոցառումներով պարզվել է, որ ակումբի հաճախորդ, Ավանի վարչական շրջանի բնակիչ Վարդան Դեմիրճյանը ժամը 01.30-ի սահմաններում իր մոտ եղած նռնակը նետել է ակումբի մուտքի ուղղությամբ, ինչի հետեւանքով տեղի է ունեցել պայթյունը:
Նույն օրը, ժամը 08.00-ի սահմաներում, ոստիկանության ծառայողները Արգավանդ գյուղի «Օջախ» ռեստորանային համալիրի մոտից ոստիկանության Կենտրոնականի բաժին բերման են ենթարկել 29-ամյա Վարդան Դեմիրճյանին, ում մոտից հայտնաբերվել է գաղտնի փականով դանակ:
Վարդան Դեմիրճյանը ձերբակալված է:
Հարուցվել է քրեական գործ ՀՀ քրեական օրենսգրքի 34-104 հոդվածի 2-րդ մասի 2-րդ եւ 6-րդ կետերի (սպանությունը, անձի կամ նրա մերձավորի, կապված այդ անձի կողմից իր ծառայողական գործունեության կամ հասարակական պարտքի կատարման հետ, շատերի կյանքի համար վտանգավոր եղանակով), 185 հոդվածի 2-րդ մասի 1-ին կետի (գույքը դիտավորությամբ ոչնչացնելը կամ վնասելը որը կատարվել է հրկիզման, պայթյունի կամ հանրավտանգ այլ եղանակով) և 235 հոդվածի 1-ին մասի (ապօրինի կերպով զենք, ռազմամթերք պահելը, կրելը), 235 հոդվածի 1-ին մասի հատկանիշներով:
Դեպքի հանգամանքները պարզվում են:
Քննությունը վարում է ոստիկանության Կենտրոնի քննչական բաժինը:
Ավելի վաղ NEWS.am-ը հայտնել էր, որ այդ տարածքում այրվել է 4 սենյակ՝ գույքով եւ միջանցքը՝ մոտ 200 քմ: Հրդեհի հետեւանքով տարբեր աստիճանի այրվածքներով Ճառագայթային բժշկության եւ այրվածքների կենտրոն են տեղափոխվել Իրանի քաղաքացիներ` 31-ամյա Նարիման Սալենիպուրը, 32-ամյա Ալիռեզա Մինային եւ 30-ամյա Ահմեդ Փոլադբուզը:
25-ամյա Նատիսե Քոնզադին, 32-ամյա Զահրո Ասադը, 24-ամյա Նազդե Նեմալը, 31-ամյա Գարիուսի Մարիամը, 10-ամյա Հուսեին եւ 4-ամյա Ֆաթիմա Թայլիները եւ Հայաստանի քաղաքացի, 34-ամյա Վահե Միրաքյանը ծխահարվել են եւ տեղում ստանալով առաջին բուժօգնություն (պարամեդիկների կողմից)` տեղափոխվել են «Արմենիա» եւ «Մուրացան» բժշկական կենտրոններ:
Բժիշկները տուժածների առողջական վիճակը գնահատել են բավարար:
