ԱՄՆ-ում գաղտնի զորավարժություններ են անցկացրել, որպեսզի կարողանան գնահատել Իսրայելի` Իրանին հարվածելու հնարավոր հետեւանքները:
Ինչպես New York Times հրատարակությանը պատմել են ԱՄՆ-ի պաշտպանության նախարարությունում, զորավարժությունների ընթացքում հանգել են այն եզրակացությանը, որ Իսրայելի կողմից նման քայլը կհանգեցնի տարածաշրջանային լայնամասշտաբ պատերազմի: Ընդ որում, նշվում է, որ առաջիններից մեկը հարվածը կընդունեն Պարսից ծոցում տեղակայված ամերիկյան բանակի ուժերը:
Զորավարժությունների ընթացքում գնահատել են նաեւ ԱՄՆ-ի մարդկային կորուստները. իրանական հրթիռների` ծոցում տեղակայված նավերի վրա հարձակվոլու դեպքում կզոհվեն ամերիկացի առնվազն 200 նավաստիներ եւ զինվորներ:
Ըստ Պենտագոնի աղբյուրի` զորավարժություններն Իրանի վրա հարձակման նախապատրաստում չեն հանդիսանում, այլ միայն տարածաշրջանում դեպքերի հնարավոր զարգացման վերարտադրություն, հայտնում է MIGnews-ը:
Ստացված եզրակացությունները մեծացնում են այն բանի մտավախությունը, որ ամերիկացիները չեն կարող Իրանի հետ հակամարտությունում մի կողմ քաշվել եւ Իսրայելի հարձակման դեպքում պետք է անմիջապես միջամտեն, որպեսզի կանխիչ միջոցառումներով նվազեցնեն իրենց հնարավոր զոհերի քանակը: