Կոսովոյի խորհրդարանը կոչ է արել երկրի կառավարությանը թույլ չտալ երկրամասի տարածքում Սերբիայի նշանակած ընտրությունների անցկացումը: Խորհրդարանի նախագահ Յակուպ Կրասնիչին պատարստակամություն է հայտնել անհրաժեշտության դեպքում ուժ կիրառել:
Նրա խոսքով, Պիշտինայում կայացած խորհրդարանի նիստում բանաձեւ է ընդունվել, որով պարտավորեցնում է կառավարությանը կանխել ապօրինի գործողությունները, որոնք խախտում են երկրի Սահմանադրությունը եւ օրենքները: Ճշտող հարցին Կրասնիչին ասել է. «Իհարկե կանխիչ միջոցառումները ներառում են նաեւ ուժի կիրառում»:
Մայիսի 6-ին սերբական իշխանությունները տեղական եւ խորհրդարանական ընտրություններ են անցկացնում, ընդ որում ենթադրվում է, որ դրանք կայանալու են նաեւ կոսովոյի տարածքում: Բնակավայրերի թվում ընդգրկված են մի ամբողջ շարք կոսովյան տարածքներ, որտեղ սերբեր են բնակվում` Կոսովսկա Միտրովիցան, Լեպոսավիչը, Նովո Բրդոն եւ Պեչը:
2008թ. Կոսովոն միակողմանի կարգով անկախություն հռչակեց, եւ նրան ճանաչեցին շատ պետություններ: Սերբիան դեմ է արտահայտվում Կոսովոյի անկախությանը:
