Անդրես Բերինգ Բրեյվիկի փաստաբանները որոշել են դատարանին համոզել, որ իրենց պաշտպանյալը բոլոր հիմքերն ուներ վախենալու, որ մահմեդականները վտանգավոր են Նորվեգիայի համար: Այդ նպատակով նրանք ցանկանում են դատարան կանչել Մոհիելդինա Մոհամեդին, մոլլա Քրեքարին եւ իսլամիստ Արֆան Բահթիին:
Բրեյվիկը համոզված է, որ նորվեգացիներն իրեն ավելի լավ կհասկանան, եթե Քրեքարը եւ Բհաթին գան դատարան:
«Մենք ցանկանում ենք լույս սփռել այն բանի վրա, թե ինչու է Բրեյվիկը պայքար սկսել. պատճառը վախն է, որ մահմեդականները կգրավեն Նորվեգիան»,- հաղորդում է MIGnews-ը:
Մոհիելդին Մոհամադն աչքի էր ընկել լուրերում երկու տարի առաջ ցույցերի հետ կապված, որոնք երկրում տեղի էին ունեցել այն բանից հետո, երբ Dagbladet հրատարակչությունը Մուհամեդ մարգարեի ծաղրանկարն էր տպել: Վերջերս նրան ձերբակալել էին այս տարվա հունվարին YouTube-ում տեսահոլովակի հրապարակման հետ կապված, որում սպառնալիքներ էին նշված թագավորական ընտանիքի անդամների եւ Նորվեգիայի կառավարության դեմ:
Մոլլա Քրեքարը, որն արդեն 20 տարի է ապրում է Նորվեգիայում որպես փախստական, ավելի վաղ դատարանում հայտնել էր, որ նա, ով այրում է Ղուրանը, արժանի է մահվան: Քրեքարը կարծում է, որ Մուհամեդ մարգարեի ծաղրանկարի հրապարակումը պատերազմի կոչ է իսլամի դեմ: Նա նաեւ մեղադրվում է նորվեգական պաշտոնյաների դեմ մահվան սպառնալիքներ հնչեցնելու մեջ, այդ թվում նաեւ պահպանողական կուսակցության առաջնորդ Էռնա Սոլբերգի հասցեին: Դատախազությունը Քրեքարի համար պահանջում է 5 տարվա ազատազրկում:
Արֆան Քադիր Բհաթին, որն ավելի վաղ արդեն մեղադրվել էր ահաբեկչության մեջ, նույնպես բազմիցս հայտարարել է, որ շարիաթ քարոզող մահմեդականներն առավելություն ունեն մնացածի նկատմամբ, եւ հենց այդ պատճառով էլ նա ձգտում է նորվեգական օրենքները փոխարինել շարիաթի օրենքներով: Բացի դրանից, նա մասնակից է 2006 թվականի սեպտեմբերին Օսլոյում սինագոգի հրաձգությանը:
Բրեյվիկի գործով դատը պետք է սկսվի ապրիլի 16-ին: