Ամերիկյան պատվիրակությունը ցուցադրաբար լքել է նիստերի դահլիճը Դուշանբեում Աֆղանստանի հարցով տնտեսական համագործակցության տարածաշրջանային կոնֆերանսի ընթացքում Իրանի նախագահ Մահմուդ Ահմադինժադի ելույթի ժամանակ, որը Աֆղանստանի բոլոր դժբախտություններում մեղադրել է ԱՄՆ-ին եւ ՆԱՏՕ-ին:
Նա հայտարարել է, որ աֆղանական ժողովուրդը մշտապես ենթարկվում է հարձակումների իր տներում, եւ նման իրադրություն է նաեւ Պակիստանում, Պաղեստինում եւ աֆրիկական մի շարք երկրներում:
«Ամբողջ խնդիրը ՆԱՏՕ-ի եւ ՆԱՏՕ-ի քաղաքականության մեջ է, որն ահաբեկչության հետ անձնական պայքարոի արդյունքում մտել է Աֆղանստան, եւ այժմ նման կարգախոսով շրջապատում է Ռուսաստանը եւ Չինաստանը», - ավելացրել է Իրանի նախագահը:
Նրա ելույթի ժամանակ ամերիկյան պատվիրակությունն ԱՄՆ-ի պետքարտուղարի օգնական Ռոբերտ Բլեյքի ղեկավարությամբ ցուցադրաբար լքել է դահլիճը եւ վերադարձել այն բանից հետո, երբ Ահմադինեժադն ավարտել է խոսքը:
Մինչդեռ, երբ ԱՄՆ-ի պատվիրակությունն իր դեմարշն էր իրականացնում, Ահմադինեժադը նախազգուշացնում էր, որ «ՆԱՏՕ-ն եւ ԱՄՆ-ը պետք է փոխվեն, քանի որ անցել է այն ժամանակը, երբ նրանք թելադրում էին իրենց պայմաններն աշխարհին»:
«Պատմությունը բազմիցս ապացուցել է, որ նման քաղաքականությունը միայն վնաս է նրանց համար, ով այն վարում է , եւ նրանք դրա համար կպատժվեն», - հայտարարել է Իրանի նախագահը, հայտնում է gazeta.ru-ն:
Ահմադինեժադը նաեւ իր առաջարկությունն է արել Աֆղանստանում իրադրության կարգավորման վերաբերյալ. ԱՄՆ-ն եւ ՆԱՏՕ-ն պետք է լքեն այդ երկիրը, եւ նրանց հեռանալով պետք է լուծվի նաեւ թմրանյութերի խնդիրը:
