Այսօր թատերական աշխարհը նշում է Թատրոնի օրը: Այն սահմանվել է 1961թ. Թատրոնի միջազգային ինստիտուտի IX կոնգրեսի կողմից:
Թատրոնի համաշխարհային օրվա առթիվ առաջին միջազգային ուղերձը գրվել է 1962թ.` ֆրանսիացի գրող եւ նկարիչ Ժան Կոկտոյի կողմից, հաղորդում է Calend պորտալը:
«Թատրոն» բառը ծագում է հին հունարեն theatron (θέατρον) բառից, ինչը նշանակում է «վայր, որտեղ դիտում են»: Ավանդաբար թատրոնում երկու առավել տարածված ժանրեր են ներկայացվում` ողբերգություն եւ կատակերգություն, որոնց խորհրդանիշն են դարձել թատերական դիմակները:
Թատերական ներկայացման մասին առաջին հիշատակությունը թվագրված է մեր թվարկությունից առաջ 2500 թվականին: Առաջին թատերական խաղը տեղի է ունեցել Եգիպտոսում, որի սյուժե են հանդիսացել եգիպտական դիցաբանական կերպարները` Օսիրիսի մասին պատմությունները: Դա թատրոնի եւ կրոնի միջեւ երկար եւ հաստատուն կապի սկզբնավորումն է եղել: Հին Հունաստանում թատրոնն սկսել է ձեւավորվել որպես արվեստ, սահմանվել են ողբերգության եւ կատակերգության, ինչպես նաեւ թատերական այլ դրսեւորումների հստակ սահմանները:
Հին հունական թատերական ներկայացումները եւս օգտագործել են դիցաբանական կերպարներ:
