նախընտրելի դարձնել
ՄԱԿ-ի՝ Մարդու իրավունքների հարցերով Գլխավոր կոմիսարի տեսչությունը քննադատությամբ է հանդես եկել Չեխիայի իշխանությունների հասցեին ներգաղթյալների իրավունքների շարունակական խախտումների եւ նրանց ստորացուցիչ պայմաններում պահելու համար:
Ինչպես հաղորդել է տեսչության պետ Զեյդ Ռաադ ալ-Հուսեյնը, փախստականներին երկրի տարածքում պահում են մինչեւ 90 օր եւ նրանցից փող են քամում նրանց իսկ կեցությունն ապահովելու համար:
Կոմիսարը նաեւ ասել է, որ ՄԱԿ-ն անհանգստացած է Չեխիայի նախագահ Միլոշ Զեմանի իսլամոֆոբ հայտարարություններով:
Այնինչ, Զեմանի ներկայացուցիչն ասել է, որ պետության ղեկավարը մտադիր է հավատարիմ մնալ իր դիրքորոշմանը, տեղեկացնում է BBC-ի ռուսական ծառայությունը:
«Նախագահը վաղուց զգուշացնում էր իսլամական արմատականության վտանգի մասին: Դա նրա կարծիքն է եւ նա իր կարծիքը չի փոխի արտասահմանից ճնշման հետեւանքով», - ասել է ներկայացուցիչը:
Մինչ այդ, Սլովենիայի Բրեժիցե ժամանակավոր վրանային ճամբարում ապրողներն այն այրել էին ի նշան բողոքի գործող իշխանությունների դեմ, որոնք, նրանց կարծիքով, չափից ավելի դանդաղ են կատարում ժամանածների գրանցումը եւ Ավստրիայի սահման տեղափոխելը:
Անցած շաբաթ Հունգարիան փակել էր Սերբիայի եւ Խորվաթիայի հետ սահմանը եւ անվտանգության նկատառումներով հրաժարվել էր ներգաղթյալներին թույլ տալ, որ իր տարածքով ուղեւորվեն մեկ ուրիշ երկիր:
