նախընտրելի դարձնելԱԺ ՀՀԿ խմբակցության պատգամավոր Ռոբերտ Սարգսյանը, ով Երեւանի քաղաքապետ Տարոն Մարգարյանի աներորդին է, վստահեցնում է, որ իր հետ նույն ընտրական տարածքում առաջադրված ԴԱՀԿ նախկին պետ Միհրան Պողոսյանի հետ մրցակիցներ չեն:
«Մենք մրցակիցներ չենք, մենք կուսակիցներ ենք», այսօր՝ փետրվարի 25-ին, ՀՀԿ կենտրոնական գրասենյակի մոտ, ՀՀ նախագահ Սերժ Սարգսյանի հետ հանդիպումից առաջ լրագրողների հետ զրույցում ասաց Ռոբերտ Սարգսյանը:
NEWS.am-ի դիտարկմանը, թե ահազանգեր կան, որ նույն ընտրական տարածքում ընտրակաշառք է բաժանվում՝ նա պնդեց, որ այդ մասին տեղեկություններ չունի, իսկ ահազանգողներին էլ խորհուրդ տվեց դիմել ոստիկանություն:
Ավելի վաղ NEWS.am-ը հայտնել էր, որ ըստ մամուլի տեղեկությունների, ՀՀԿ տարածքային ցուցակով առաջադրված թեկնածուներն արդեն սկսել են ընտրակաշառք բաժանել, կամ տարբեր տեսակի խոստումներ տալ, ցուցակագրել մարդկանց:
Մասնավորապես, «Ժողովուրդ» թերթը գրել էր, որ Երեւանի քաղաքապետ Տարոն Մարգարյանը վարչական ողջ ռեսուրսը կենտրոնացրել է, որպեսզի իր աներորդուն` Ռոբերտ Սարգսյանին, ՀՀԿ ռեյտինգային ցուցակով Երեւանի թիվ 1 ընտրատարածքից կրկին դարձնի պատգամավոր: «Երեւանի քաղաքապետարանի ու դրա ենթակայության տակ գտնվող բոլոր հիմնարկների աշխատակիցներին հրահանգվել է Զեյթունում գրանցված քաղաքացիների ցուցակներ ներկայացնել:
Բանն այն է, որ Երեւանի թիվ 1 ընտրատարածքում ՀՀԿ ռեյտինգային ցուցակով բացի Ռ. Սարգսյանից՝ առաջադրվել է նաեւ ԴԱՀԿ նախկին պետ Միհրան Պողոսյանը՝ Քեթրինի Միհրանը: Ու հիմա Տ. Մարգարյանն ուզում է, որ իրենք հնարավորինս շատ ձայներ ստանան նաեւ Զեյթունից, որպեսզի ռեյտինգային ցուցակում առաջինը իրենք լինեն, այլ ոչ թե Միհրան Պողոսյանը»,-գրել էր թերթը:
