Մալթայի կառավարությունը հաղորդել է, որ հետ է կանչում Ռուսաստանում իր դեսպանին Սկրիպալի գործի կապակցությամբ խորհրդակցությունների նպատակով, հաղորդում է «ՌԻԱ Նովոստի»-ն:

«Սոլսբերիում հարձակման համատեքստում Մալթայի կառավարությունը քաղաքական խորհրդակցությունների համար հետ է կանչում իր դեսպանին Մոսկվայից: Մալթայի կառավարությունը լիարժեք սոլիդարություն է հայտնում բրիտանական կառավարությանը մեր ընդհանուր անվտանգության դեմ այս լրջագույն մարտահրավերի ֆոնին»,- հայտնել է կառավարությունը Twitter-ում:

Հիշեցնենք, որ բրիտանական Սոլսբերիում մարտի 4-ին նյարդակաթվածային նյութով թունավորել էին Գլխավոր հետախուզական վարչության նախկին փոխգնդապետ Սերգեյ Սկրիպալին եւ նրա դստերը: Բրիտանական կողմը պնդում է, որ ռուսական պետությունը մասնակից է Սկրիպալի թունավորմանը: Ռուսաստանը կտրականապես ժխտում է այդ մեղադրանքը: Մեծ Բրիտանիայից հետո մի շարք ԵՄ երկրներ, ինչպես նաեւ Միացյալ Նահանգները, Կանադան, Նորվեգիան, Ուկրաինան եւ այլ երկրներ Սկրիպալի գործի կապակցությամբ որոշում են կայացրել ռուս դիվանագետների արտաքսման մասին: