Աֆրիկյան միությունը դադարեցրել է Բուրկինա Ֆասոյի գործունեությունը՝ երկրում հեղաշրջումից մեկ շաբաթ անց, հայտնում է AFP-ն։

15 անդամից բաղկացած ԱՄ-ի Խաղաղության եւ անվտանգության խորհուրդը Twitter-ում հայտնել է, որ քվեարկել է «Բուրկինա Ֆասոյի մասնակցությունը միության բոլոր գործողություններին կասեցնելու օգտին, քանի դեռ երկրում չի վերականգնվել սահմանադրական կարգը»:

Այս քայլը նախաձեռնվել է երեք օր անց այն բանից, երբ Արեւմտաաֆրիկյան պետությունների տնտեսական միությունը հեռացրել է Բուրկինա Ֆասոյին իր շարքերից եւ նախազգուշացրել է հնարավոր պատժամիջոցների մասին՝ սպասելով խունտայի հետ հանդիպումների արդյունքներին:

Շաբաթ օրը Արեւմտաաֆրիկյան պետությունների տնտեսական միությունը ռազմական ղեկավարներին ուղարկել է հանդիպելու խունտայի առաջնորդ, փոխգնդապետ Փոլ-Անրի Սանդաոգո Դամիբայի հետ։

Խունտան «հաստատել է իր հավատարմությունը ենթատարածաշրջանային եւ միջազգային կազմակերպություններին», ասվում է հայտարարության մեջ:

Հունվարի 24-ին ապստամբ զինվորները կալանավորել են նախագահ Ռոհ Մարկ Քրիստիան Կաբորեին՝ հասարակության աճող զայրույթի պատճառով՝ այն բանի համար, որ նա չի կարողանում դադարեցնել ջիհադիստների բռնությունները, որոնք կողոպտում են աղքատ ազգին: Ավելի ուշ նրանք հրապարակել են ձեռագիր նամակ, որտեղ հայտարարվում է նրա հրաժարականի մասին, փաստաթուղթ, որն, կուսակցության անդամի հավաստմամբ, իսկական է:

Խունտան ցրել է կառավարությունն ու խորհրդարանը եւ դադարեցրել սահմանադրության գործողությունը՝ խոստանալով «ողջամիտ ժամկետում» վերականգնել «սահմանադրական կարգը»։