Հայաստանն ու ԵՄ-ը, եթե խաղաղության համաձայնագիր ստորագրվի Ադրբեջանի հետ, կարող են քննարկել ԵՄ դիտորդական առաքելության նոր մանդատի հարցը։ Այս մասին Ազգային ժողովում եվրոպական ինտեգրման հարցերի մշտական​​խորհրդարանական հանձնաժողովի նիստում կառավարության 2024թ. ծրագրի կատարման հաշվետվության քննարկման ժամանակ ասել է արտաքին գործերի փոխնախարար Պարույր Հովհաննիսյանը։

«Այդ մանդատը 2 տարով է։ Իհարկե, ապագայում, եթե խաղաղության համաձայնագիրը ստորագրվի, վավերացվի, եւ հայտնվեն նշաններ, որոնք կվկայեն կայուն խաղաղության մասին, մենք կկարողանանք քննարկել նոր մանդատը եվրոպացի դիտորդների համար։ Չէ՞ որ պարտադիր չէ սահմանափակվել միայն սահմանային գծով»,- նշել է Հովհաննիսյանը։

Մանդատը, նրա խոսքով, ներառում է նաեւ վստահության ամրապնդման աշխատանքներ իրականացնելու անհրաժեշտությունը։ «Բաքվի հետ հարաբերությունների զարգացման դրական սցենարի դեպքում կարելի է գտնել ճիշտ մոդելներ՝ ուղղված ԵՄ առաքելության հետ աշխատանքը շարունակելուն»,- ավելացրել է փոխնախարարը։

Հարցին, թե Ադրբեջանը կարող է պահանջել եվրոպական առաքելության ամբողջական դուրսբերումը՝ օգտագործելով խաղաղության համաձայնագրում «երրորդ ուժերի դուրսբերման» մասին անորոշ ձեւակերպումը, ԱԳՆ ներկայացուցիչը, մասնավորապես, նշել է. «Սա դիտորդական առաքելություն է։ Հետեւաբար, տրամաբանությունը թելադրում է, որ նման պահանջներ պարզապես չպետք է լինեն։ Սակայն ինչ-որ որոշակիության մասին խոսելը բավական դժվար է»։