Երեկ տեղի ունեցածը ամոթ է։ Այս մասին դեկտեմբերի 5-ին Ազգային ժողովում տեղի ունեցած տարվա վերջին ավանդական ճեպազրույցի ժամանակ հայտնել է ընդդիմադիր «Հայաստան» դաշինքի պատգամավոր Արթուր Խաչատրյանը։

Պատգամավորի խոսքով՝ սա Հայաստանում միապետական, բացարձակ բռնապետություն հաստատելու փորձ է։

«Արշակ արքեպիսկոպոս Խաչատրյանի դեմ առաջադրված մեղադրանքները ծաղր են մարդկային բանականության եւ սեփական ժողովրդի դեմ։ Իշխանությունների մոտեցումն է. «Անում եմ այն, ինչ ուզում եմ։ Չե՞ս ուզում։ Դե, ուրեմն արա այն, ինչ ուզում ես»։ Հենց սա է այն սկզբունքը, որով գործում է ՀՀ վարչապետ Նիկոլ Փաշինյանը»,- ասել է Խաչատրյանը։

Պատգամավորն ընդգծել է, որ իշխանությունները սկզբում ձգտում էին վարկաբեկել Արշակ արքեպիսկոպոս Խաչատրյանին։

«Բայց հետո տեսան, որ նա հաստատակամ է, ուժեղ եւ կանգնած է կաթողիկոսի թիկունքին, իսկ կաթողիկոսը կանգնած է նրա թիկունքին։ Արդյունքում՝ ծնվեց այս անհեթեթ մեղադրանքը։ Իսկ «գրպանում թմրանյութեր դնելը»... Սա այլ կառույցներին բնորոշ ոճ է»,- ավելացրել է ընդդիմադիր գործիչը։