ՆախընտրելիԽորհրդային միության փլատակների վրա ձեւավորված ավտորիտար, հակահայկական համակարգը 2013 թվականի փետրվարի 18-ին արձանագրեց անդառնալի ճաքեր, իսկ ապրիլի 9-ը համակարգի տապալման համար դարձավ աննախադեպ բեկումնային: Նման բովանդակությամբ հայտարարությամբ է հանդես եկել «Ժառանգություն» խմբակցության քարտուղար Զարուհի Փոստանջյանը:
Նա իր կահյատարարությունում նաեւ նշում է.
«Լայնածավալ ազգային եւ համաժողովրդական գործընթացները հայոց կյանքում սկիզբ դրեցին նոր երեւույթի` կեղծ իշխանավորի չճանաչմանը, առանց բռնության պայքարի կիրառմանը, վերկուսակցական, հայկական քաղաքական, միասնական եւ հիմնական նպատակի հռչակմանը:
Մեր հիմնական նպատակն է. ժողովրդավարական ղեկավարման համակարգի ներդրմամբ Հայկական բարձրավանդակում Հայկական պետականության վերականգնում, որտեղ յուրաքանչյուր հայ հնարավորություն ունի արժանապատիվ ապրելու:
Մեր առաջնային նպատակն է. Սահմանադրական Նոր Հայաստանի պետական իշխանության ձեւավորում օրենսդիր, գործադիր եւ դատական իշխանությունների բաժանման եւ հավասարակշռման հիման վրա:
Մեր նպատակին հասնելու համար մենք ունենք անհրաժեշտ նվազագույն պայմաններ` դրանք հետեւյալն են.
• Շուրջ 49 հազար քառ. կիլոմետր հայերով բնակեցված պատմական Հայրենիք:
• 2013 թվականի փետրվարի 18-ին ՀՀ նախագահական ընտրություններում բացարձակ մեծամասնության քվե ստացած առաջնորդ` Րաֆֆի Հովհաննիսյան, ով սկսեց լայնածավալ ժողովրդական շարժում եւ հայտարարեց, որ չի ճանաչում կեղծ ինքնահռչակ Սերժ Սարգսյանին:
• Հարյուր հազարավոր մարդկանց հանուն Սահմանադրական Նոր Հայաստանի հրապարակավ երդման ստանձնում:
• Անձնակազմ` երիտասարդներ եւ միջին տարիքի հայեր՝ պատրաստ անհատույց ծառայելու:
Մեր նպատակին հասնելու ճանապարհին խոչընդոտների նկատմամբ մեր վերաբերմունքը`
Կեղծ եւ, ըստ էության, օտար, ինքնահռչակ պաշտոնյաներին ճանաչում ենք որպես հանցագործներ: Նրանց հետ հաղորդակցում ենք, որպես հանցագործների` ովքեր զինված են, ում ձերքերում գտնվում է մեր ժողովրդի նյութական կարողության որոշակի մասը, ովքեր ինչ-որ չափով գտնվում են ազատության մեջ եւ ունեն որոշակի հովանավորություն այլ պետությունների կողմից:
Մեր առաջիկա քայլերը.
• ՀՀ-ում անցկացվող բոլոր մակարդակի ընտրություններին մասնակցություն՝ դիտարկելով նրանց որպես մարտական տարրեր պարունակող գործողություններ, այդ թվում նաեւ այսօրվա Երեւանի ավագանու ընտրություններին:
• Մայիսի 9-ին ժամը 18:00 Աազատության հրապարակում Սահմանադրական Նոր Հայաստանի հանրահավաք:
• Սահմանադրական Նոր Հայաստանի ընտրված եւ ժողովրդի առաջնորդ`Րաֆֆի Հովհաննիսյանի լիազորությամբ ժողովրդի ամբողջական իշխանության ձեւավորման ամենօրյա գործունեության ծավալում»:
