նախընտրելի դարձնելԴերասան Վարդան Պետրոսյանի մասնակցությամբ վթարի դեպքի վայրի արձանագրությունը Կոտայքի մարզի ընդհանուր իրավասության դատարանը անթույլատրելի չի ճանաչի, անգամ եթե արձանագրության տակ որպես ընթերակա ստորագրած Վազգեն Գարեգինի Կարապետյանը չգտնվի։ Այս մասին NEWS.am-ի հետ զրույցում ասաց տուժող կողմի փաստաբան Ռուբեն Բալոյանը:
«Ես հասկացա, որ ընթերականերից մեկը ինչ-որ մի տվյալ ճիշը չի ասել: Անվան կամ հայրանվան մի տառն էլ սխալ գրվի, էդ անունը կփոխվի ու կդառնա խնդիր: Բայց չի կարելի ասել, որ երկրորդ ընթերական չի եղել: Այս ապացույցը անթույլատրելի չի ճանաչվի: Անթույլատրելի կճանաչվեր, եթե ինչ-որ ստորագրություններ կեղծված լինեին, ինչ-որ տարբերություններ լինեին ստորագրությունների մեջ ու ապացուցվեր, որ սա իրականում մեկ ընթերակայով կատարված զննությունն է»,- կարծիք հայտնեց Ռուբեն Բալոյանը:
Վարդան Պետրոսյանի փաստաբան Նիկոլայ Բաղդասարյանը, սակայն, հավաստիացնում է, որ ապացույցը պետք է անթույլատրելի ճանաչվի, քանի որ հայտնի չէ՝ այդ մարդը իրավունք ուներ ներգրավվել որպես ընթերակա, թե ոչ:
«Ինչ որ մեկը ստորագրել է այդ թղթի տակ: Դա եղել է ոստիկանության աշխատող, թե եղել է ինչ-որ մի անձ, որն ուղղակի ստորագրել է փաստաթղթի տակ, հայտնի չէ: Եթե հայտնի չէ, ապա չենք կարող իմանալ՝ ինքը իրավունք ուներ լինել, ընթերակա թե ոչ: Սա իմանալու համար անհրաժեշտ են տարրական իրավաբանական գիտելիքներ», - նշեց Նիկոլայ Բաղդասարյանը:
Փաստաբանի խոսքով՝ այս իրավիճակում արադարացում չի կարող լինել այն, որ ընթերական ինչ-որ տվյալ սխալ է հայտնել, եւ այդ պատճառով չեն կարողանում գտնել նրան: Նիկոլայ Բաղադասարյանը պնդում է, որ քննիչը պարտավոր էր անձնագրով ստուգել քաղաքացու տվյալները, նախքան նրան որպես ընթերակա ներգրավելը:
Նշենք, որ հոկտեմբերի 20-ին կատարված դեպքի վայրի զննության արձանագրության տակ ստորագրած ընթերականերից մեկի տվյալներով մարդ Հայաստանում չկա (Կոտայքի մարզի Զորավան գյուղ, 1985թ. ծնված Վազգեն Գարեգինի Կարապետյան): Դերասանի պաշտպան Նիկոլայ Բաղդասարյանն էլ հանդես է եկել այդ ապացույցը անթույլատրելի ճանաչելու միջնորդությամբ՝ մատնանշելով, որ այն ձեռք է բերվել քննչական գործողությունների խախտմամբ:
Նշենք, որ Նիկոլայ Բաղդասարյանի խոսքով՝ արձանագրության վավերականությունը որոշելը կարեւոր է այնքանով, որ եթե այն անվավեր ճանաչվի, դերասան Վարդան Պետրոսյանը ազատ կարձակվի։
Հիշեցնենք, որ ըստ մեղադրական եզրակացության՝ Վարդան Պետրոսյանը 2013թ. հոկտեմբերի 20-ին, ժամը 22:10–ի սահմաններում, Կոտայքի մարզի Սարալանջ գյուղի կողմից դեպի Երեւան ուղղությամբ վարելիս «ԲՄՎ-320» մակնիշի մեքենայով բախվել է կայանած «Վազ 21214» մակնիշի մեքենայի հետնամասին։ Վթարի հետեւանքով «Վազ-21214» մակնիշի մեքենայի ուղեւորներ էդվարդ եւ էդգար Հայկի Հակոբյանները մահացել են, ուղեւորներ Տաթեւիկ Հակոբյանը, Հայկ Հակոբյանը, էմմա Հակոբյանը, ինչպես նաեւ վարորդ Արթուր Հակոբյանն ստացել են վնասվածքներ: Վարդան Պետրոսյանին մեղադրանք է առաջադրվել ՀՀ քրեական օրենսգրքի 242-րդ հոդվածի 3-րդ մասի հատկանիշներով՝ «Ճանապարհային երթևեկության կամ տրանսպորտային միջոցների շահագործման կանոնները խախտելը, որն անզգուշությամբ առաջացրել է երկու կամ ավելի մարդու մահ»։ Տուժող կողմը փորձում է ապացուցել, որ Վարդան Պետրոսյանը վթարի պահին եղել է ալկոհոլի ազդեցության տակ եւ գերազանցել է թույլատրելի արագությունը։ Դերասանը հերքում է այդ վարկածը եւ իրեն հերթին փորձում է ապացուցել, որ տուժող կողմի մեքենան կայանած է եղել ոչ թե ճանապարհի կողնակին, այլ երթեւեկելի գոտում, ունեցել է անսարքություններ։
