նախընտրելի դարձնելՓետրվարի 3-ի առավոտյան Արագածոտնի մարզի Ոսկեվազ գյուղի մի բնակիչ ոստիկանության Աշտարակի բաժին հաղորդում էր տվել, որ գիշերն իր գեղեցկության սրահից գողություն են արել: Կոտրել էին եվրոպատուհանն ու գողացել մազ կտրելու սարքեր, պայուսակներ, օծանելիքի 40 սրվակ, տղամարդու 50 ժամացույց, արծաթյա զարդեր եւ այլն:
Դեպքի առթիվ հարուցվեց քրեական գործ: Աշտարակի ոստիկանները սկսեցին բացահայտման աշխատանքը: Արդյունքը ստացվեց 12 օր անց: Բաժնի քրեական հետախույզների ու անչափահասների գործերով եւ ընտանիքում բռնության կանխարգելման բաժանմունքի ծառայողների օպերատիվ-հետախուզական համատեղ միջոցառումների շնորհիվ փետրվարի 15-ին Արմավիրի մարզի Ակնաշեն գյուղի իր տնից, գողություն կատարելու կասկածանքով, Աշտարակի բաժին բերման ենթարկվեց 26-ամյա մի երիտասարդ:
Ոստիկաններն արդեն տեղյակ էին, որ նա մենակ չէր եղել, որ գործին խառն էր նաեւ տուժածի համագյուղացիներից մեկը: Հաջորդ օրը բերման ենթարկվեց նաեւ հանցակիցը` Ոսկեվազ գյուղի բնակիչ, 27-ամյա երիտասարդը:
Ըստ նախնական տվյալների` նրանք գողությունն արել են փետրվարի լույս 3-ի գիշերը։ Գողոնը մայրաքաղաքում վաճառել էին անծանոթ անձանց եւ ստացված 100 հազար դրամը բաժանել իրար մեջ:
Քրեական գործի շրջանակներում, դատարանի որոշմամբ, խուզարկություն է կատարվել ակնաշենցի տղային պատկանող վագոն տնակում: Հայտնաբերվել եւ առգրավվել է գողոնի մի մասը` ժամացույներ, բջջային հեռախոսներ, պայուսակներ եւ այլն:
Նախաքննությունը շարունակվում է:
