նախընտրելի դարձնելԻշխանությունը ներկայիս վիճակը համարում է իշխանության ղեկին մնալու երաշխիք։ Այս մասին մարտի 1-ին քննարկումների ժամանակ հայտարարեց «Այլընտրանքային նախագծեր» խմբի փորձագետ Վահե Հովհաննիսյանը։
Նա վստահ է, որ նոր հետպատերազմյան էջ բացվելուց հետո նրանց մնալն անիմաստ կդառնա։ Ըստ նրա՝ միավորման ձեւաչափով փոփոխությունները պետք է նախաձեռնեն արտաիշխանական ուժերը, սակայն նրանց դեռ չի հաջողվում լուծել խնդիրը։ «Այն բանից հետո, երբ փոխվեցին սահմանները, բնակչությունը, ռիսկերը, նպատակները, խնդիրները, չի ստացվում նոր բովանդակություն գտնել եւ ներկայացնել հանրությանը։ Այսօր Հայաստանում ամեն ինչ հին է։ Փոխվում է տարածաշրջանը, փոխվում են Եվրոպան եւ աշխարհը, սակայն մենք մնում ենք հին պատկերացումների մեջ»,- հավելեց Հովհաննիսյանը։
Փորձագետը նշեց, որ նոր քաղաքական միտք փողոցում չի ծնվում։ «Աղետ է եղել։ Բայց արդյոք պետք է միշտ մնանք այս վիճակում։ Ինչ-որ մեկը պե՞տք է օրակարգ ձեւավորի։ Իշխանությունը դա չի անի։ Ընդդիմությունը ռեսուրսներ ունի, բայց այս ուղղությամբ քայլեր չի ձեռնարկում, քանի որ ձեւաչափերը ֆունկցիոնալ չեն։
Չկա միջավայր, որը կձեւավորեր բովանդակությունը․ նոր ձեւաչափ, նոր քաղաքական ուժեր, այդ թվում՝ նախկինների ռեֆորմացիայի միջոցով։ Վերջինը պետք է հիմնված լինի «զրոյից պետություն» ստեղծելու գաղափարի վրա, ներառյալ՝ արտաքին հարաբերություններ, անվտանգության համակարգ, տնտեսական մոդել, հայկական աշխարհի հայեցակարգ եւ այլն։ Հայկական նոր օրակարգը պետք է սկսել զրոյից։ Առաջին ռեսուրսը հաջողության հիշողությունն է՝ 1990-ականներին մեզ հաջողվեց պետություն կառուցել եւ հաղթել։ Երկրորդ ռեսուրսը մարդկային ռեսուրսն է։ Եթե կա 200 հազար մարդ, որոնք խնդիր են դնում իրենց առջեւ, ապա կհաջողվի լուծել այն»,- պարզաբանեց նա։
Նոր օրակարգը, ըստ Հովհաննիսյանի, պետք է ներառի Հայաստանի եւ Արցախի անվտանգության ապահովման, Արցախից հայերի հեռանալու գործընթացը կասեցնելու խնդիրը, իսկ երկրորդ խնդիրը պետք է կապված լինի ամեն գնով Սյունիքի ռիսկերի թեման փակելու հետ։ «Մեկ այլ խնդիր է հայկական աշխարհի կործանումը, Հայաստան-Արցախ-սփյուռք եռամիասնությունը փլուզվել է, ճգնաժամ է առաջացել։ Հայաստանը որպես պետություն վարկաբեկվում է հայկական աշխարհում։ Նոր օրակարգը պետք է հիմնված լինի երկու սյուների վրա՝ արժանապատվության եւ սառը պրագմատիզմ։ Հակառակն արկածախնդրություն է»,- նշեց փորձագետը։
Նրա կանխատեսմամբ՝ նոր օրակարգի ձեւավորումն անխոչընդոտ չի անցնի։ ««Սեւերի եւ սպիտակների» պառակտման գաղափարն արդեն կորցրել է իր ազդեցությունը, բայց նրանք, ովքեր մշակել եւ իրականացրել են այս գաղափարը, հասկանում են, որ այն այլեւս չի աշխատում։ Այս ռիսկերը պետք է չեզոքացվեն․ հասարակական գործիչները պետք է միջընտրական երկխոսություն վարեն»,- եզրափակեց Վահե Հովհաննիսյանը։
