ԵԽ-ի Նախարարների կոմիտեում Հայաստանի նախագահության հիմնական գերակայություններից են ռասայական խտրականության, ատելության հրահրման եւ անհանդուրժողականության դեմ պայքարը: Այս մասին այսօր` հունիսի 24-ին, հայտնել է ԵԽ-ի Նախարարների կոմիտեի նախագահ, Հայաստանի արտգործնախարար Էդվարդ Նալբանդյանը` ԵԽԽՎ ամառային նստաշրջանի ընթացքում դիմելով պատվիրակներին:
Նա վստահեցրել է, որ Հայաստանը կշարունակի ԵԽ-ի նախարարների կոմիտեի նախորդ նախագահի ջանքերը՝ ժողովրդավարության հաստատման, մարդու իրավունքների պաշտպանության եւ օրենքի գերակայության ուղղությամբ: Հայաստանն աջակցում է ատելության հրահրման դեմ պայքարին ուղղված հետեւողական ջանքերին, ընդգծել է նախարարը:
Ըստ Նալբանդյանի` տեխնոլոգիաների մեր դարում ատելության հրահրումը ներթափանցել է համացանց եւ ազդում է երիտասարդ սերնդի վրա: Հայաստանի արտգործնախարարն ընդգծել է, որ Հայաստանն ամբողջությամբ ներգրավվել է ատելության քարոզչության դեմ պայքարի գործին (no-hate speech)` մարդու իրավունքները նաեւ համացանցում պաշտպանելու համար:
Մարդու իրավունքների եվրոպական կոնվենցիայի կարեւորությունն ընդգծելով` Նալբանդյանը հայտնել է, որ Հայաստանը մեծ նշանակություն է տալիս դրա իրացմանը:
Արտգործնախարարը նաեւ ընդգծել է, որ Հայաստանը կարեւորում է օրենքի պատշաճ գործառնականությունը:
Հայաստանը պատրաստ է ԵԽԽՎ-ում համագործակցությանը` Նախարարների կոմիտեի եւ Վեհաժողովի նպատակների եւ երկխոսության ամրապնդման նպատակով, հայտնել է Էդվարդ Նալբանդյանը:
