Հուլիս 15-ին Երեւանի Նոր-Նորք թաղամասում հարեւանների կողմից դաժան ծեծի ենթարկվելուց հետո մահացած, արցախյան ազատամարտի մասնակից, 52-ամյա Վարդան Թումանյանը մինչեւ վերջ չի հանձնվել, գլխին բազմաթիվ հարվածներ ստանալու եւ արնահոսելուց հետո էլ փորձել է ոտքի կանգնել, որպեսզի չվախեցնի կռվին ներկա դստերն ու կնոջը: NEWS.am-ի հետ զրույցում այս մասին ասաց ազատամարտիկ Վարդան Թումանյանի կինը՝ Տանյա Մելքումյանը, որը դեպքի վայրում մեր թղթակցին պատմեց կատարվածի մանրամասները։

«Ոնց որ Վարդանը մեռած լիներ՝ սիրտը աշխատում էր, բայց մեռած էր: Դաժան ծեծի ընթացքում նա ուշագնաց չի եղել. ինքը նրանց դիմաց ուշագնաց չէր լինի, թուրքի ձեռքից դուրս ա եկել, որ դրանց դիմաց ուշագնաց լինե՞ր»,-  ասաց տիկին Տանյան:

Տիկին Տանյայի համար անհասկանալի է հարեւանների նման դաժանությունը. ամուսնուն սպանել են շախմատի խաղի ժամանակ թեթեւ վիճաբանության պատճառով. «Ամեն ինչ սկսվել է զրուցարանում թեթեւակի վիճաբանությունից՝ շախմատ խաղալիս են եղել, Վարդանը ասել է՝ աբարանցիները կրվել չեն սիրում: Բաբկեն Սարգսյանը դրանից վրդովվել է ու Վարդանին ասել՝ թուրք: Վարդանը խառնել է շախմատի քարերը, ասել՝ ուրեմն չեք խաղալու: Բաբկենը ուզել ա շախմատի տախտակով հարվաել Վարդանին, ինքն էլ հրել ա Բաբկենին, ու նա ընկել ա: Վարդանն ել  զգուշացրել ա ու ասել ՝մեծ մարդ ես, քեզ խելոք պահի»:

Տանյա Մելքումյանի խոսքով՝ զրուցարանում վիճաբանությունն ավարտվել է, սակայն որոշ ժամանակ անց, երբ Վարդան Թումանյանը արդեն տանն էր, եկել են Բաբկեն Սարգսյանի հարազատները նրա հետ «զրուցելու»:

«Եկան Սարգիս եւ Վիկտոր Սարգսյանները (խմբ.Բաբկեն Սարգսյանի թոռները) եւ Վարդանին դուրս կանչեցին: Ես ծառի մոտ թաքնվեցի ու լսեցի, որ ասում են՝ ներողություն պիտի խնդրես, Վարդանն էլ ասաց՝ ես չեմ խնդրի, ինչի՞ համար: Այդ բառի վրա Սարգիսը հարվածեց, Վարդանը ասֆլատի վրա կանգնած թռավ, ընկավ խոտերի մեջ: Ծեծկռտուքը դաժան էր, հարվածների մեծ մասը գլխին էր ուղղված: Օգնում էին, որ բարձրանա ու նորից խփում, ընկած ժամանակ էլ հարվածում էին որովայնին, կրծքին: Հետո հայտնվեց Ջունգլը (խմբ. Բաբկեն Սարգսյանի որդին՝ Գեւորգ Սարգսյանը), նա էլ մազերից էր բռնել ու բռնուցքով գլխին էր հարածում: Դա ջունգլիներից փախած էր: Հետո նրանց միացավ նաեւ Բաբկեն Սարգսյանը»,- պատմեց սպանված ազատամարտիկի կինը:

Տիկին Տանյան պատմեց, որ ծեծկռտուքին անակատես է եղել նաեւ Վարդան Թումանյանի 22-ամյա դուստրը՝ Վիկտորյան.

«Աղջիկս փորձում էր կանգնեցնել նրանց եւ հեռախոսով նրանց թիկունքին էր հարվածում, բայց անօգուտ: Ես էլ քաշքշում էի, բայց ինձ մի կողմ էին հրում: Դաժան ծեծից հետո բաց թողեցին ամուսնուս»:

Ազատամարտիկի կինը հիշում է՝ Սարգսյանները հեռանալիս  իրեն ասել են՝ «շնորհակալ եղիր, որ չսատկացրինք»:

«Դաժան ծեծից հետ բաց թողեցին ամուսնուս, իրենց ադրենալինը արդեն լիքն էր, լցվել էր ադրենալինը: Հետո աղջիկս, որ գրկած տանում էր, ինքնասիրությունն էր տանում Վարդանին:  Արյունը հոսում էր ականջից, քթից, բերանից, բայց ինքը ասում էր՝ Վիկ, ինձ բան չի եղել, լավ եմ, ամաչում էր»,- պատմեց սպանվածի կինը:

Հարազատները Վարդան Թումանյանին այդ օրը տեղափոխել են հիվանդանոց, հաջորդ օրը գլուխը վիրահատել են, որից ժամեր անց նա մահացել է:

Ծեծկռտուքը տեղի է ունեցել Վարդան Թումանյանի տան մոտ, հուլիսի 13-ին, ժամը 17:30-ի սահմաններում, բայց ոչ ոք չի փորձել օգնել ազատամարտկին, քանի որ, ըստ Տանյա Մելքումյանի, Սարգսյանների ընտանիքից բոլորը վախենում են:

«Այդ պահին, տղա կա, որ անցնում էր, նա շանն էր  ման տալիս: Այդ տղան  վատ տրամադրված չէր ամուսնուս նկատմամբ, եթե ոչ՝ ճիշտ հակառակը: Ուղղակի բոլորը վախենում են նրանցից, այդ պատճառով  այդ տղան չմոտեցավ եւ շանն էլ չարձակեց, որովհետեւ գիտեր՝ ոհմակը իր շանը կուտեր, իսկ ինքը իր շան շատ էր սիրում»,- ասաց ազատամարտիկի կինը:

52-ամյա Վարդան Թումանյանը չորս երեխաների հայր էր, տան հիմնական աշխատողն էր, արհեստավոր: Նրա 12-ամյա դուստրը՝ Լիլին տառապում է մանկական ուղեղային կաթվածով:

Տիկին Տանյան պատմեց, որ երբ դեպքի օրը Վարդան Թումանյանին տեղափոխել են հիվանդանոց, նա մեկ անգամ փախել է այնտեղից, որովհետեւ չի չանկացել գումար ծախսել իր վրա. «Նա մտածում էր, որ այդ գումարը Լիլիի համար է, նրա դեղերի համար»:

Ինչպես ավելի վաղ հաղորդել էր NEWS.am-ը, հուլիսի 13-ին մարմնական վնասվածքներով հիվանդանոց տեղափոխված եւ հուլիսի 15-ին մահացած ազատամարտիկ Վարդան Թումանյանի մահվան առնչությամբ հարուցվել է քրեական գործ Քրեական օրենսգրքի 112-րդ հոդվածի 2-րդ մասի 6-րդ, 14-րդ կետերով, այն է՝ Դիտավորությամբ առողջությանը ծանր վնաս պատճառելը, որը կատարվել է մի խումբ անձանց կամ կազմակերպված խմբի կողմից, եւ անզգուշությամբ առաջացրել տուժողի մահ: Գեւորգ Սարգսյանն ու Գագիկ Ղուկասյանը կալանավորվել են։ Նախաքննությունը շարունակվում է: