Վրաստանի, Ադրբեջանի եւ Թուրքիայի ռազմական համագործակցությունից ՀԱՊԿ-ի նման կառույց չի ստացվի. դա ավելի շատ նման է «մկների խաղի»: Այս մասին NEWS.am-ի թղթակցի հետ զրույցում հայտնեց ռուսաստանցի ռազմական փորձագետ Վլադիմիր Եվսեեւը՝ անդրադառնալով ադրբեջանցի փորձագետ Ուզեիր Ջաֆարովի կարծիքին այն մասին, թե Ադրբեջանի, Վրաստանի եւ Թուրքիայի պաշտպանության նախարարների եռակողմ հանդիպումը կարելի է մեկնաբանել որպես ՀԱՊԿ-ի նման կառույցի ստեղծման նախնական փուլ:
Ինչ վերաբերում է Թուրքիայի եւ Ադրբեջանի միջեւ ռազմական համագործակցությանը. փորձագետի խոսքով, բոլորն են հասկանում, որ զենքի մատակարարում կա, կադրեր են պատրաստում: «Բայց ահա Վրաստանին այստեղ մի փոքր ընդառաջում են: Իրականում այդքան էլ չեմ հասկանում, ինչում է կայանում Վրաստանի եւ Ադրբեջանի միջեւ ռազմական համագործակցությունը: Դեռեւս կարող եմ հասկանալ Թուրքիայի եւ Վրաստանի միջեւ ինչ-որ համագործակցություն, բայց պարտադիր չէ ռազմական, սակայն Ադրբեջանի եւ Վրաստանի միջեւ համագործակցությունն անհավանական է»,- նշեց Եվսեեւը:
Նա հիշեցրեց, որ Թուրքիան ՆԱՏՕ-ի անդամ է, Վրաստանը ձգտում է ՆԱՏՕ-ի կազմում հայտնվել, Ադրբեջանը դեպի ՆԱՏՕ չի ձգտում, բայց ցանկանում է մոտենալ: «Ստացվում է, որ այս տեսակետից նրանք ընդհանուր հիմք ունենք, սակայն եթե խորը դիտարկենք, Բաքվի ու Թբիլիսիի մերձեցման համար լուրջ պատճառ չկա, բացառությամբ՝ տարանցիկ միջանցքի: Ռազմական համագործակցությունն այդքան էլ ձեռնտու չէ Վրաստանին: Նա, իհարկե, կարող է ձեւացնել, թե միասին են, ընդհանուր կառույցներ են կառուցում»,- կարծիք հայտնեց փորձագետը՝ միաժամանակ հիշեցնելով, որ նման կառույց արդեն եղել է՝ ՎՈւԱՄ-ը, որն էլ հաջողությամբ փլուզվել է: Հնարավոր է՝ Վրաստանի, Ադրբեջանի եւ Թուրքիայի մասնակցությամբ պաշտպանական կառույցը մոտավորապես նման ճակատագիրն ունենա:
«Հատկանշական է, որ նրանք Նախիջեւանում են հանդիպել: Այստեղ հետագա իրադարձությունների զարգացման որոշակի սցենար կա: Իրաքի Քուրդիստանը կարող է անկախ դառնալ, եւ դա Թուրքիայի համար իրական գլխացավ կառաջացնի, քանի որ ոչ ոք չի կարող ասել, որ Թուրքիայի մի մասը չի ցանկանա միանալ Իրաքի Քուրդիստանին: Ամենից զարմանալին այն է, որ Նախիջեւանի հենց այն հատվածը, որտեղ քրդեր են բնակվում, կարող է ցանկանալ միանալ Իրաքի Քուրդիստանին: Ուստի Նախիջեւանի ապագան նույնքան մութ է, որքան այս երկրների կազմակերպությունը, որը կամենում են ստեղծել»,- եզրափակեց ռազմական փորձագետը:
Հիշեցնենք, որ Նախիջեւանում օգոստոսի 19-ին կայացավ Ադրբեջանի, Թուրքիայի եւ Վրաստանի պաշտպանության նախարարներ Զաքիր Հասանովի, Իսմեթ Յըլմազի եւ Իրակլի Ալասանիայի հանդիպումը:
