Սփյուռքի նախարար Հրանուշ Հակոբյանի եւ արգենտինաբնակ դուդուկահար Գագիկ Գասպարյանի՝ օգոստոսի 20-ին կայացած հանդիպման ժամանակ քննարկվել են հայապահպանության, հայ մշակույթի տարածման ու պահպանման, Հայոց Ցեղասպանության 100-րդ տարելիցին նվիրված միջոցառումների կազմակերպման հետ կապված հարցեր: Այս մասին տեղեկացնում է Հայաստանի Սփյուռքի նախարարության մամուլի ծառայությունը:
Գագիկ Գասպարյանն Արգենտինա է մեկնել 1997 թվականին: Այստեղ նա ինչպես ստեղծագործական, այնպես էլ հայապահպանությանն ուղղված գործունեություն է ծավալում: Երաժիշտն իրականացրած բազմաթիվ ծրագրերով ճանաչելի է դարձնում հայ մշակույթն ամբողջ Լատինական Ամերիկայում:
Գագիկ Գասպարյանն առաջինն է եղել, որ արտերկրում սեփական միջոցներով Արցախյան ազատամարտի հերոսների հիշատակին նվիրված հուշակոթող է կառուցել, ինչի համար արժանացել է Արցախի Ազգային ժողովի հուշամեդալի:
Հայ երաժիշտը բազմաթիվ պարգեւներ ու մրցանակներ է ստացել նաեւ Արգենտինայի պետության կողմից:
Գագիկ Գասպարյանն առաջին անգամ արգենտինական ֆիլմերում կիրառել է հայկական դուդուկի երաժշտությունը: Նա տարբեր ազգերի երաժիշտների հետ թողարկել է միասնական՝ 50 եւ անհատական 4 ձայնասկավառակ, որոնք վաճառվում են աշխարհի շուրջ 45 երկրներում: Սկավառակներից մեկը նվիրված է Արցախյան ազատամարտի հերոսների հիշատակին, իսկ դրա վաճառքի իրավունքը նվիրել է «Հայաստան» հիմնադրամին, որպեսզի հասույթը փոխանցվի Արցախի օգնության ծրագրերին:
Գագիկ Գասպարյանը նաեւ 30 օտարազգի եւ 2 հայ աշակերտ ունի: Նա օգնում եւ համագործակցում է Կորդովա քաղաքի «Գուսան» ազգային նվագարանների համույթի հետ:
