Սեւանում այս տարի 4 մարդ է խեղդվել, ընդ որում՝ մեկը ջուրն է ցատկել մոտորանավակից, սակայն չի կարողացել լողալ, քանի որ կաթված է ստացել:
Այս մասին օգոստոսի 22-ին հայտարարել է ԱԻՆ Գեղարքունիքի մարզային փրկարարական վարչության փրկարար ջոկատի հրամանատար, ավագ լեյտենանտ Արմեն Ճզմաչյանը:
Ըստ նրա՝ քանի որ եղանակային բարենպաստ պայմաններով պայմանավորված Սեւանում հանգստացողների թիվը ներկայումս ավելացել է, անհրաժեշտ է հետեւել փրկարարների հորդորներին եւ խորհուրդներին, չլողալ ոչ սթափ վիճակում կամ կուշտ ուտելուց հետո, ջրային տրանսպորտից չցատկել ջուրը, չլողալ անծանոթ ջրային տարածքում, լողալ այն տարածքում, որտեղ կան փրկարարներ, հեռու մնալ խիստ արագընթաց ջրային տրանսպորտային միջոցներից: «Հատուկ փրկարարական ջոկատը կազմված է 38 փրկարարներից, իսկ Սեւանի ողջ ափի հսկողության համար մեծ թվով աշխատակիցներ են պետք, եթե հաշվի առնենք, որ տարածքը մոտ 220 – 230 կմ է:
Մեր ուժերով հսկում ենք հանրային երեք լողափ, կոնկրետ այս տարի՝ «Գեղամա» հանգստի գոտին, ինչպես նաեւ աշխատակիցներն արձագանքում են մասնավոր լողափերի ազդանշաններին», - նշել է Արմեն Ճզմաչյանը: