Հավանաբար պատերազմն Ուկրաինայի արեւելքում «փակուղային իրավիճակով» կավարտվի եւ ռուսամետ ակտիվիստների վերահսկողության ներքո գտնվող տարածքները կպահպանվեն: Այս մասին հայտարարել է ՆԱՏՕ-ի ճգնաժամերի արձագանքման կենտրոնի տնօրեն, գեներալ Նիկո Տակը՝ բելգիական Մոնս քաղաքում Եվրոպայում ՆԱՏՕ-ի միացյալ զինված ուժերի շտաբում տեղի ունեցած ճեպազրույցի ընթացքում:
«Արդի իրավիճակը թույլ է տալիս ենթադրել, որ հակամարտությունը կավարտվի փակուղային իրավիճակով, անջատողականների կողմից վերահսկվող տարածքները կարգելափակվեն, սակայն անջատողականները պարտություն չեն կրի»,- պնդել է նա:
Ըստ ԻՏԱՌ ՏԱՍՍ-ի, ՆԱՏՕ-ում ենթադրում են, որ սա հնարավոր է դարձել Ուկրաինայի կոնֆլիկտին Ռուսաստանի ուղղակի միջամտության հետեւանքով: Դաշինքը համարում է, որ «Ուկրաինայի տարածքում գործում է ավելի քան 1000 ռուս զինվորական»:
«Ռուսաստանը հակամարտության գոտի ծանր հրետանի է ուղարկում, որը ղեկավարում են ռուս զինվորականները»,- վստահ է գեներալ Տակը:
