«Էյր Արմենիան» աշխատել եւ կշարունակի աշխատել շուկայում: Այդ մասին այսօր՝ սեպտեմբերի 12-ին, լրագրողներին հայտարարեց «Էյր Արմենիա» հայկական ավիաընկերության գործադիր տնօրեն Արսեն Ավետիսյանը՝ մեկնաբանելով ՌԴ-ի օդանավարկային ծառայության՝ «Ռոսաերոնավիգացիայի»՝ ընկերության հետ իր գործնական նամակագրությունը հրապարակելու որոշումը:
Նրա խոսքով՝ «Էյր Արմենիան» ռուս ավիափոխադրողների համար լուրջ մրցակից է, ինչի մասին վկայում են չոր թվերը: «Շուկա մտնելու պահից տոմսերի գները էժանացել են 35%-ով, ընդ որում՝ նկատեք, որ միայն այն տեղերի համար, որտեղ մենք թռչում ենք: Մնացած ուղղություններով գներն անփոփոխ են», - հավելեց Ավետիսյանը:
Բնականաբար, սա նվազեցրել է ռուսական ընկերությունների շահույթը, ինչպես եւ «Էյր Արմենիայինը», սակայն սա «Ռոսաերոնավիգացիայի» հետ ուղղակիորեն կապելը հիմնավորված չէ, հավալեց Ավետիսյանը:
«Վերջերս մենք դեպի Ֆրանկֆուրտ նոր չվերթ բացեցինք: Եվ դրանից հետո միանգամից խնդիրներ ծագեցին» «Ռոսաերոնավիգացիայի» հետ: Չգիտեմ՝ սա համընկնում էր, թե ոչ: Ես ոչ մեկին չեմ մեղադրում, կասեմ միայն մի բան. աթե որեւէ մեկը ցանկանում է մեզ շուկայից դուրս մղել, թող հույս չունենա», - հայտարարեց նա:
Նշենք, որ ընկերության ներկայացուցիչները NEWS.am-ին հաղորդել են, որ պարտավորությունը տեխնիկական բնույթ է կրում: Ընկերության հավաստիացմամբ՝ օդանավարկային ծառայությունների համար գանձման ենթակա մոտ 406 հազարը ժամանակին վճարել չի հաջողվել ՝ ընկերությունից անկախ հանգամանքներով. վճարումներն իրականացնող ռուսական բանկերից մեկի մոտ արեւմտյան պատժամիջոցների հետեւանքով խնդիրներ են առաջացել: Մոտ ժամանակներս դրանք կվճարվեն մեկ այլ բանկի միջոցով՝ ամբողջ ծավալով:
