«Բարգավաճ Հայաստան» կուսակցության առաջնորդ Գագիկ Ծառուկյանն իր հարցազրույցում ամեն ինչ հստակ ձեւակերպել է: NEWS.am-ի հետ զրույցում ՀԱԿ մամուլի խոսնակ Արման Մուսինյանի հայտարարությանը, թե ԲՀԿ-ն էլ է պայքարում Սերժ Սարգսյանի վարչակազմի դեմ, այսպես արձագանքեց ԱԺ ԲՀԿ խմբակցության քարտուղար Նաիրա Զոհրաբյանը:
«Գագիկ Ծառուկյանի ծրագրային հարցազրույցում կարծում եմ՝ ամեն ինչ հստակ ձեւակերպված է: ԲՀԿ-ն կողմ է երկրում լրջագույն համակարգային փոփոխությունների, եւ այդ մասին մենք մեր առաջիկա մարզային եւ քաղաքային հանդիպումներում առավել մանրամասն կխոսենք»,- ասաց նա:
Նշենք, որ սեպտեմբերի 16-ին կայացած մամուլի ասուլիսի ժամանակ Արման Մուսինյանը, անդրադառնալով Գագիկ Ծառուկյանի վերջին հարցազրույցին, ասել էր. «Հարցազրույցում շատ հարցերի պատասխաններ սպառիչ տրվել են, կասկածները փարատվել են։ Մեր գործընկեր ԲՀԿ-ն ըստ էության արդեն տեւական ժամանակ իր գործողություններով կանգնած է ոչ իշխանական ուժերի եւ հասարակության կողքին, պաշտպանում է նրանց շահերը եւ Սերժ Սարգսյանի դեմ են պայքարում»: