Ես երբեք չեմ մտել եւ չեմ մտնելու քաղաքական տարբեր հարաբերությունների մեջ, որոնք երբեմն շատ մանր են, իսկ երբեմն էլ ավելի շատ հիշեցնում են սովորական առեւտուր: Դա իմը չէ, ինձ չի սազում: Այս մասին Zham.am-ին տված հարցազրույցում նշել է ԲՀԿ առաջնորդ Գագիկ Ծառուկյանը:
«Ես շատ լավ գիտեմ Հայաստանյան քաղաքական դաշտի խաղի կանոնները, հարաբերությունների՝ մեղմ ասած, ոչ այնքան ազնիվ խաղի կանոնները: Ճիշտ հասկացեք, ինձ համար դա օտար եւ անհետաքրքիր զբաղմունք է:
Եթե ես քաղաքական դաշտում մտածեի անձնական շահի մասին, ապա ես ընդհանրապես չէի մտնի քաղաքականություն»,-ասել է նա՝ հավելելով, որ քաղաքական դաշտում լինելու իմ միակ դրդապատճառը ժողովրդի վատ վիճակն է, որոնք թողնում հեռանում են:
Անդրադառնալով ԲՀԿ-ի առաջիկա անելիքներին, Ծառուկյանը նշել է. «Մոտակա ժամանակներում ես պլանավորում եմ քաղաքական հանդիպումների եւ խորհրդակցությունների մեծ փուլ` քաղաքական կուսակցությունների, հասարակական կառույցների ներկայացուցիչների հետ: Ես կարծում եմ, որ հիմա կա նման հանդիպումների անհրաժեշտությունը: Եվ ակնհայտորեն կա նման ցանկություն շատերի մոտ:
Ես չեմ ուզում բացել փակագծերը, բայց այս հանդիպումները շատ կարեւոր են` մոտեցումների հստակեցման, տեսակետների փոխանակման եւ առաջիկա անելիքների քննարկման համար»:
Ինչ վերաբերում է Քառյակի ճակատագրին, Ծառուկյանն ասել է. «Կա հնարավորություն` խնդիրները իրար հետ քննարկելու, միասնական փոխզիջումային որոշումներ կայացնելու. Ու դա շատ լավ է: Չի լինի նման հնարավորություն` ողբերգություն պետք չէ սարքել: Այդ դեպքում քաղաքական ուժերի հետ ԲՀԿ-ն կաշխատի երկկողմ հարաբերությունների մեխանիզմով»: