Չնայած այն բանին, որ ՆԱՏՕ-ն սառեցրել է Ռուսաստանի հետ ռազմական, քաղաքական համագործակցության բոլոր ոլորտները, Ուելսի գագաթնաժողովի ընթացքում ընդգծվել է, որ հաղորդակցության քաղաքական ուղիները բաց են: Այդ մասին այսօր՝ սեպտեմբերի 17-ին, «ՆԱՏՕ-ի գագաթնաժողովի ազդեցությունը Հայաստանի եւ Հարավային կովկասի վրա» թեմայով քննարկման ժամանակ հայտարարեց Հանրապետական խմբակցության պատգամավոր, Ազգային ժողովի պաշտպանության, ներքին գործերի եւ ազգային անվտանգության մշական հանձնաժողովի նախագահ Կորյուն Նահապետյանը:
Պատգամավորը հիշեցրեց, որ գագաթնաժողովին ընդգծվել է, որ Հյուսիսատլանտյան դաշինքը սատարում է Ռուսաստանի նկատմամբ կիրառվող միջազգային պատժամիջոցները եւ պատրաստ է աջակցել Ուկրաինաին, սակայն ոչ սպառազինությամբ: «Միաժամանակ նաեւ նշվել է, որ ՆԱՏՕ-ն կշարունակի կարեւորել Եվրատլանտյան անվտանգության եւ Ռուսաստանի հետ հարաբերությունների շուրջ ռազմավարական երկխոսությանը: Հայաստանի համար, բնականաբար կարեւոր է, որ ՆԱՏՕ-ն ու Ռուսաստանը պահպանեն երկխոսության ձեւաչափը: Հայաստանի արտաքին քաղաքականությունը չի հիմնվում Ռուսաստանի ու ՆԱՏՕ-ի միջեւ ընտրության վրա. Հայաստանը հստակ գիտակցում է ազգային անվտանգության իր պահանջները, իսկ ՆԱՏՕ-ն ու Ռուսաստանը կարեւորում են Հայաստանի դերը տարածաշրջանային անվտանգության համատեքստում», - նշեց Կորյուն Նահապետյանը:
