Ազգային ժողովի ՀՅԴ խմբակցությունը ոչ իշխանական մյուս ուժերին չի առաջարկել համատեղ հանրահավաքը հետաձգել 5 օրով: NEWS.am-ի հետ զրույցում ԱԺ ԲՀԿ խմբակցության քարտուղար Նաիրա Զոհրաբյանն ընդգծեց, որ 5 օրվա մասին խոսք չի եղել:
«Մեր գործընկերներն առաջարկեցին սպասել հոկտեմբերի 15-ից հետո, մինչեւ իշխանությունները կարձագանքեն ՀՅԴ-ի առաջարկներին՝ կապված Սահմանադրական փոփոխությունների հետ: Իսկ այդ արձագանքը կարող է լինել նոյեմբերի 20-ին, հունվարի 1-ին, ընդհուպ հանրաքվեից մի քանի օր առաջ: Հասկանալի է, որ հոկտեմբերի 15-ին ուղիղ ժամը 18:00-ին արձագանքը չէր լինի»,- ասաց նա:
Նշենք, որ ՀՅԴ-ական Արմեն Ռուստամյանն ու Աղվան Վարդանյանը լրագրողներին ավելի վաղ վստահեցրել էր, որ իրենք առաջարկել են հանրահավաքը հետաձգել մինչեւ հոկտեմբերի 15-ը, սակայն ԲՀԿ-ն, ՀԱԿ-ն ու «Ժառանգություն»-ը չեն համաձայնվել:
Հիշեցնենք, որ ոչ իշխանական երեք ուժերի (ԲՀԿ, ՀԱԿ, «Ժառանգություն») համատեղ հանրահավաքը տեղի կունենա հոկտեմբերի 10-ին Ազատության հրապարակում։ Սահմանադրական բարեփոխումների շուրջ տարաձայնությունների պատճառով ՀՅԴ-ն հրաժարվել է մասնակցել հանրահավաքին։