ՀՅԴ-ն չի մասնակցում ոչ իշխանական ուժերի կազմակերպած համատեղ հանրահավաքին սահմանադրական բարեփոխումների պատճառով։ Այս մասին այսօր՝ սեպտեմբերի 17-ին, ոչ իշխանական քառյակի (ԲՀԿ, ՀԱԿ, «Ժառանգություն», ՀՅԴ) նիստից հետո լրագրողների հետ զրույցում ասաց ԱԺ ՀՅԴ խմբակցության ղեկավար Արմեն Ռուստամյանը՝ նշելով, որ այդ բարեփոխումներն իրենց համար շատ կարեւոր են։
«Մեզ համար միշտ են կարեւոր եղել սահմանադրական բարեփոխումները։ Մենք ցանկանում ենք, որ երկիրն անցնի խորհրդարանական կառավարման համակարգի։ Մենք ունեինք փաթեթ, որը պատրաստ էինք քննարկել քառյակի հետ եւ համաձայնեցրել։ Ինչ վերաբերում է հանրահավաքին, ապա այնտեղ կոնկրետ խոսք պետք է հնչի, սակայն սահմանադրական բարեփոխումների հարցն այնքան կարեւոր է եւ կարծիքներն այնքան տարբեր են, որ չէր կարող համատեղ հանրահավաք լինել»,- ասաց նա։
Արմեն Ռուստամյանի խոսքով՝ սահմանադրական բարեփոխումների մասին հանրահավաքի ժամանակ խոսելը նախկինում օրակարգում չի եղել, իրենք միշտ վստահ են եղել, որ Ազատության հրապարակում քննարկվելու է քառյակի առաջ քաշած 12 պահանջների կատարումը։
«Ինչպես գիտենք, սահմանադրական բարեփոխումների հայեցակարգը հայտնի կլինի հոկտեմբերի 15-ից հետո։ Մենք առաջարկեցինք մեր գործընկերներին, որ սպասենք մինչեւ այդ ժամկետը, որից հետո արդեն կանդրադառնանք այդ խնդրին։ Բայց մեզ հետ չհամաձայնվեցին»,- ավելացրեց նա։
Նշենք, որ քառյակն իր 12 պահանջները ներկայացրել է հունիսի 10-ին եւ մինչեւ աշուն ժամանակ տվել իշխանություններին՝ իրենց պահանջները կատարելու համար:
Այդ կետերը վերաբերվում են կուտակային կենսաթոշակային համակարգին, շրջանառության հարկին, կարմիր գծանշումներին, գյուղմթերքի արտադրությանը, «Նաիրիտ» գործարանին, «Որոտան» ՀԷԿ-երի համալիրի գույքի վաճառքին, տրանսպորտի թանկացմանը, 100 տոկոսանոց համամասնական ընտրակարգին:
Նշենք, որ եռյակի հանրահավաքը տեղի կունենա հոկտեմբերի 10-ին Ազատության հրապարակում։ ՀՅԴ-ն չի մասնակցելու հանրահավաքին։
