Հայաստանի եւ Հունաստանի նախագահները պայմանավորվել են ակտիվացնել տնտեսական համագործակցությունը: Այդ մասին այսօր՝ սեպտեմբերի 30-ին իր հույն գործընկերոջ՝ Կարոլոս Պապուլիասի հետ ճեպազրույցի ժամանակ հայտարարեց ՀՀ նախագահ Սերժ Սարգսյանը:
Հայաստանի նախագահն ընդգծեց բարձր մակարդակում այցերի կարեւորությունը՝ նշելով, որ դրանք վկայում են պատմական բարեկամության վրա հիմնված հարաբերությունները շարունակելու եւ զարգացնելու երկրների մտադրության մասին:
Նրա խոսքով՝ բանակցությունների ընթացքում մանրամասն քննարկվել են երկկողմ հարաբերությունների օրակարգային հարցերը, կողմերը միակարծիք են, որ միջպետական հարաբերությունները միշտ առնաձնացել են բարձր մակարդակով:
Նախագահն ընդգծեց Հայաստանի եւ Հունաստանի պաշտպանության նախարարների հաջող համագործակցությունը: Սերժ Սարգսյանը նշեց, որ շնորհիվ համագործակցության, հայ զինծառայողները Հունաստանում որակյալ կրթություն են ստանում եւ ռազմակրթական հաստատություններում վերապատրաստում անցնում: Եվ պատահական չէ, որ հայ եւ հույն խաղարարների համատեղ աշխատանքը բազմաթիվ անգամներ արժանացել է ամենաբարձր գնահատականների, նշեց Սարգսյանը:
Միեւնույն ժամանակ, նախագահը հիշեցրեց, որ առեւտրատնտեսական կապերը խթանման կարիք ունեն: Այդ նպատակին կծառայի Երեւանում անցկացվելիք հայ-հունական բիզնես ֆորումը, որն այսօր կբացվի երկու նախագահների մասնակցությամբ: Տնտեսական կապերի զարգացման համատեքստում նախագահը նշեց նաեւ միջկառավարական հանձնաժողովի գործունեությունը, որի հերթական նիստը ծրագրվում է մոտ ժամանակներս:
Հունաստանի նախագահ Կարոլոս Պապուլիասի այցի շրջանակներում նաեւ երկու փաստաթուղթ է ստորագրվել, որոնք համալրեցին երկու երկրների միջեւ 4 տասնյակից ավելի փաստաթղթերից բաղկացած իրավապայմանագրային բազան: Ինչպես նշեց Սարգսյանը, Հայաստանը մեծ կարեւորություն է տալիս Հունաստանի հետ իրավապայմանագրային բազայի ընդլայնմանը՝ հաշվի առնելով, որ Հունաստանը ԵՄ-ի եւ ՆԱՏՕ-ի անդամ է: Եվ վերջում Սերժ Սարգսյանը ընդգծեց ԵՄ-ի հետ հարաբերությունները զարգացնելու պաշտոնական Երեւանի վճռականությունը՝ այդ հարցում ակնկալելով բարեկամական Հունաստանի աջակցությունը:
