Հայաստանը շարունակում է հավասարակշռված քաղաքականությունը, եւ նման քաղաքականության անհրաժեշտությունն այժմ ավելի կարեւոր է, քան նույնիսկ մի քանի ամիս կամ տարի առաջ: Այս մասին հոկտեմբերի 1-ի մամուլի ասուլիսում հայտարարել է Կովկասի ինստիտուտի փոխտնօրեն, քաղաքագետ Սերգեյ Մինասյանը՝ անդրադառնալով Ուելսում ՆԱՏՕ-ի գագաթաժողովում ՀՀ նախագահ Սերժ Սարգսյանի ելույթին:
Այս հավասարակշռված քաղաքականության ամենակարեւոր նպատակը, ըստ քաղաքագետի, ոչ միայն հավասարակշռություն պահելն է, այլեւ Հայաստանը աշխարհաքաղաքական հակամարտությունների դաշտի վերածելը թույլ չտալը, ինչպիսիք դարձան Ուկրաինան, Մոլդովան եւ Վրաստանը: «Հետեւաբար, Հայաստանի համար փոխլրացումը շատ կարեւոր է: Լինելով ՀԱՊԿ անդամ երկիր եւ Ռուսաստանի ռազմաքաղաքական դաշնակից՝ Հայաստանը, մյուս կողմից, Վրաստանից հետո երկրորդ հետխորհրդային երկիրն է, որն ակտիվ մասնակցում է ՆԱՏՕ-ի խաղաղապահ առաքելություններին», - ընդգծել է Սերգեյ Մինասյանը: Եվ ներկայումս, հիշեցրել է քաղաքագետը, Հայաստանը պատրաստվում է մասնակցել նաեւ ՄԱԿ-ի ռազմաքաղաքական գործողությանը՝ ՆԱՏՕ-ի կարեւոր մասնակից անդամ Իտալիայի զորքերի շրջանակներում, որն իրականացնում է Լիբանանում գործողության հրամանատարությունը: «Սա նույնպես բավական հատկանշական ցուցանիշ է, որ Հայաստանը փորձում է հավասարակշռություն պահպանել», - նշել է Մինասյանը:
Լիբանանում ՄԱԿ-ի ժամանակավոր ուժերի հրամանատարությունն (UNIFIL) իրականացնող Իտալիան դիմել է Երեւանին՝ առաջարկելով հայկական զորքերն ընդգրկել խաղաղապահ առաքելությունում: Հայ խաղաղապահներն ապահովելու են առաքելության գրասենյակների անվտանգությունը: