Սպիտակի բժշկական կենտրոն բերված 40 օրական երեխան արդեն մահացած էր: Այս մասին NEWS.am-ի թղթակցի հետ զրույցում ասաց հիվանդանոցի տնօրեն Արսեն Մկրտչյանը:
«Երեխային բերել են արդեն մահացած վիճակում, հերթապահ քույրը ասել է, որ երեխան չկա, հարազատները ասել են՝ ուր տանենք, Կիրովական ենք տանում, քույրն էլ ասել է՝ տարեք Նարեկ՝ մանկական բաժանմունք»,-ասաց տնօրենը՝ հավելելով, որ քույրը ոչ թե պետք է ասեր, որ երեխան չկա, այլ պետք է ասեր, որ երեխան մահացած է:
Նա տեղեկացրեց, որ երբ երեխային բերել են, իրենց մոտ լույսերը անջատած է եղել, քաղաքում ինչ-որ վթար է եղել, բայց 5 րոպե անց լույսերը եկել են: Երեխային չի հասցրել զննել նաեւ հերթապահ բժիշկը, մինչեւ սենյակից եկել է, արդեն նրան տարել են: «Մեռած մարդուն ի˚նչ օգնություն ցույց տաս»,- ասաց տնօրենը՝ ի պատասխան հարցի, թե իրենց մոտ որեւէ բան արվել է, թե ոչ:
Բժիշկն հայտնեց, որ նախնական վարկածով՝ երեխայի մոտ թոքաբորբ է եղել, թեեւ ամեն ինչ ցույց կտա դատաբժշկական փորձաքննությունը:
Ավելի վաղ NEWS.am-ը հայտնել էր, որ ՀՀ քննչական կոմիտեի Լոռու մարզային քննչական վարչության պետի ցուցումով հարուցվել է քրեական գործ` մանկահասակ (40 օրական) Ն.Խաչատրյանի մահվան դեպքի առթիվ: ՀՀ Քննչական կոմիտեից հայտնում են, որ այս տարվա նոյեմբերի 16-ին` ժամը 06:10-ի սահմաններում, բուժօգնություն ստանալու նպատակով ծնողների կողմից «Սպիտակի բժշկական կենտրոն» ՓԲ ընկերություն է տեղափոխվել Լոռու մարզի Ջրաշեն գյուղի մանկահասակ բնակչուհի, 2014 թվականի հոկտեմբերի 7-ին ծնված Նարինե Խաչատրյանը, սակայն բուժսպասարկում իրականացնող բժիշկները վերջինիս բուժօգնություն չեն ցուցաբերել, առաջարկել են նրան տեղափոխել «Վանաձորի բժշկական կենտրոն» ՓԲ ընկերություն։ Այսինքն՝ չեն կատարել իրենց մասնագիտական պարտականությունները, դրանց նկատմամբ անփույթ և անբարեխիղճ վերաբերմունք ցուցաբերել, ինչն առաջացրել է երեխայի մահը:
«Սպիտակի բժշկական կենտրոն» ՓԲ ընկերության աշխատակիցների կողմից մասնագիտական պարտականությունները չկատարելու և անզգուշությամբ Նարինե Խաչատրյանի մահն առաջացնելու դեպքի առթիվ ՀՀ քննչական կոմիտեի Լոռու մարզային քննչական վարչության Սպիտակի քննչական բաժնում հարուցվել է քրեական գործ` ՀՀ քրեական օրենսգրքի 130-րդ հոդվածի 2-րդ մասով:
Կատարվում է նախաքննություն: