«Նախախորհրդարանը» չնայած որդեգրել է խաղաղ պայքարի ճանապարհը, սակայն իշխանության կողմից շարունակական ուժային մեթոդների կիրառման դեպքում կանցնի զինված պայքարի։ Այս մասին այսօր՝ դեկտեմբերի 3-ին, լրագրողներին հայտնեց «Նախախորհրդարանի» անդամ Գեւորգ Սաֆարյանը։
«Եթե մենք համարենք, որ մեր երկրում այլեւս խաղաղ պայքարով հնարավոր չէ հարցի լուծման հասնել, ապա կընդվզենք եւ կդիմենք ուժային պայքարի միջոցների։ Այսօր մեր երկրում կան հարյուրավոր երիտասարդներ, ովքեր ցանկացած պահի պատրաստ են զենք վերցնելու։ Այսօր մեր ձեռքը գնում է զենքին, բայց նաեւ լսելով մեր ավագ սերնդի հորդորները, կոչերը, մենք զինյալ պայքար չենք սկսկում։ Որպեսզի սա չլինի, ես զգուշացնում եմ ռեժիմին. ապրիլի 24-ին ռեժիմը հեռացվելու է, ցանկացած ձեւով, մի դրդեք մեզ գնալ կոպիտ գործողությունների»,- ասաց Գեւորգ Սաֆարյանը։
Գեւորգ Սաֆարյանը, որի նկատմամբ հարձակում էր կատարվել նոյեմբերի 27-ի երեկոյան, հույս չունի, որ ոստիկանությունը կբացահայտի մեղավորներին. «Եթե ոստիկանությունն ուզեր, հիմա արդեն մարդիկ ձերբակալված կլինեին»։
«Նախախորհրդարանի» քարտուղարության համակարգող Ժիրայր Սեֆիլյանը նշեց, որ համակարգից իրենք հույս չունեն, եւ առանձին քննություն են անցկացնելու. «Այդ ամբողջը կբացահայտվի ռեժիմի տապալումից օրեր անց, 20 տարվա ամբողջ ռեպրեսիան ջրի երես է գալու»։
«Նախախորհրդարանի» անդամ Գարեգին Չուգասզյանի խոսքով՝ «100-ամյակն առանց ռեժիմի» շարժման նկատմամբ վերջին շրջանի ոտնձգությունները նպատակ ունեն վախեցնել շարժման մասնակիցներին։
«Զարմանալի է, որ այսքան շուտ ռեժիմը անցավ ուժային մեթոդներով ճնշումների։ Իրենց նպատակը հենց ապրիլի 24-ը տեղաշարժելն է, այսինքն մեզ հրահրել, ստիպել ըմբոստանալ, ոչ թե ապրիլի 24-ին այլ ավելի շուտ, մենք այդ սադրանքին չենք տրվում։ Մենք մաքսիմում զսպված ենք լինելու եւ շարունակելու ենք մեր այս մարտավարությունը»,- ասաց Գարեգին Չուգասզյանը։
Ըստ նրա՝ իրենց նկատմամբ իրականացված «ահաբեկչական գործողությունները» լրջորեն նպաստել են իրենց քարոզչական աշխատանքներին։
«Փաստորեն իրենք օգնեցին քարոզչական աշխատանքին։ Մենք դեռեւս չէինք սկսել լայնամասշտաբ աշխատանքներ, իրենց արաքներով տասնյակ-հազարավոր մարդիկ իմացան այս շարժման գոյության մասին, ավտոերթերի մասին, եւ հենց ապրիլի 24-ին ռեժիմին հեռացնելու մեր ծրագրի մասին»,- ասաց Չուգասզյանը։
Նշենք, որ դեկտեմբերի 7-ին իրազեկման ավթոերթ կանցկացվի Երեւանում, իսկ դեկտեմբերի 20-ին եւ 21-ին ավտոերթը կուղեւորվի Սյունիք եւ Արցախ։
