Եվրամիության դիվանագիտության ղեկավար Ֆեդերիկա Մոգերինին հայտարարել է, որ ինքը եւ Ուկրաինայի նախագահ Պյոտր Պորոշենկոն Ռուսաստանի կողմից մեծ պատրաստակամության ազդանշաններ են տեսել՝ Ուկրաինայում ճգնաժամը հաղթահարելու հարցում: Այս մասին գրում է Reuters-ը:
«Մենք կիսում ենք տպավորությունը, որ գոյություն ունեն որոշ տարրեր, որոնք կարող են մեզ թույլ տալ ավելի մեծ պատրաստակամություն տեսնել՝ Ռուսաստանի, նախագահ Պուտինի կողմից հակամարտությունը լուծելու հարցում»,- Կիեւում լրագրողներին ասել է Մոգերինին:
Սակայն, նրա խոսքով, անհրաժեշտ է, որպեսզի Ռուսաստանը կոնկրետ քայլեր ձեռնարկի՝ հրադադարի վերաբերյալ Մինսկում ձեռք բերված պայմանավորվածությունների համաձայն:
Հիշեցնենք, որ ավելի վաղ ԱՄՆ պետքարտուղար Ջոն Քերրին հայտարարել էր, որ վերջին օրերին Ռուսաստանը «կառուցողական քայլեր» է ձեռնարկում՝ ուղղված Ուկրաինայում լարվածության թուլացմանը: