Խորհրդարանական եռյակը առաջարկում է Գյումրիի ողբերգության հարցով խորհրդարանական լսումներ անցկացնել նոր ձեւաչափով: Այս մասին հունվարի 30-ին խորհրդարանական եռյակի նիստի ավարտին հայտարարել է «Ժառանգություն» կուսակցության ղեկավար Ռուբեն Հակոբյանը:
Ըստ նրա՝ «այդ հանցագործությունը իրավական նորմերի սահմաններից դուրս է»: «Մենք նաեւ դեմ ենք, որպեսզի սա շոուի եւ տարբեր շահարկումների առիթ դառնա», - միաժամանակ վստահեցրել է պատգամավորը: Հակոբյանը նշել է, որ լսումներին անհրաժեշտ է ԱԳ նախարարի, ոստիկանապետի եւ ՀՀ ազգային անվտանգության ծառայության պետի մասնակցությունը: Պատգամավորը նաեւ հայտնել է, որ իրենք առաջարկում են խորհրդարանական լսումներ անցկացնել հաջորդ ուրբաթ:
Հիշեցնենք, որ հունվարի 12-ի առավոտյան Գյումրիի Մյասնիկյան փողոցի տներից մեկում հրազենային վնասվածքներից սպանված էին գտել Ավետիսյանների ընտանիքի 6 անդամներին, այդ թվում՝ մեկուկես տարեկան դստերը: Վեց ամսական Սերյոժա Ավետիսյանը ծանր վիճակում տեղափոխվել էր հիվանդանոց, որտեղ 7 օր անց մահացել էր:
Կասկածյալը ռուս զինվորական Վալերի Պավելի Պերմյակովն է: Ներկայումս նա գտնվում է ռուսական ռազմակայանում: Նրան կալանավորել են եւ մեղադրանք են առաջադրել Ռուսաստանի Դաշնության Քրեական օրենսգրքի 105-րդ հոդվածի 2-րդ (երկուսից ավելի մարդկանց սպանություն) եւ 338-րդ հոդվածի 2-րդ մասի (դասալքություն՝ ծառայողական զենքով): Սպանության փաստով քրգործ է հարուցվել նաեւ ՀՀ Քննչական կոմիտեում:
Հունվարի 22-ին խորհրդարանական հանձնաժողովներն արդեն Գյումրիի ողբերգության վերաբերյալ նիստ անցկացրել են, որի ընթացքում ելույթ էր ունեցել ՀՀ գլխավոր Դատախազ Գեւորգ Կոստանյանը:
