А320-ի երկրորդ օդաչու Անդրեաս Լյուբիցը, որին կասկածում են ինքնաթիռը կանխամտածված կործանման տանելու մեջ, ավիաաղետից կարճ ժամանակ առաջ տեսողության հետ կապված խնդիրներ է ունեցել եւ դիմել է բուժօգնության:
New York Times-ը, վկայակոչելով հետաքննությանը մոտ կանգնած երկու աղբյուրի, գրում է, որ իշխանությունները չեն բացառում Լյուբիցի տեսողական խնդիրների եւ հոգեկան վիճակի միջեւ կապը:
Ավելի վաղ հետաքննության ձեռք բերած ապացույցները վկայում են, որ Լյուբիցը Germanwings ավիաընկերությունից թաքցրել է առողջական խնդիրները: Հաղորդվում էր նաեւ նրա, իբր, երկարատեւ դեպրեսիայի մասին, իսկ աղետից երկու շաբաթ առաջ օդաչուն բուժզննում է անցել Դյուսելդորֆի համալսարանական կլինիկայում:
Germanwings ավիաընկերության՝ Բարսելոնայից Դյուսելդորֆ ուղեւորվող Airbus A320 ինքնաթիռը կործանվել է մարտի 24-ին, Ֆրանսիայի հարավ-արեւելյան Ալպ շրջանում: Աղետի հետեւանքով 150 մարդ է զոհվել:
Մարսելի դատախազությունը մարտի 26-ին հայտարարել էր, որ երկրորդ օդաչուին կասկածում են ինքնաթիռը կանխամտածված կործանման տանելու մեջ: Մարտի 28-ին, սակայն, դատախազ Բրիս Ռոբենը հայտարարել է, որ Լյուբիցի գործողությունները որակել են որպես «ոչ կանխամտածված սպանություն»:
