ՀՀ Էներգետիկայի նախարար Երվանդ Զախարյանը այսօր՝ մարտի 31-ին, ընդունել է Նաիրիտի 5 աշխատակիցների: NEWS.am-ի հետ զրույցում Նաիրիտի մամուլի նախկին քարտուղար Անուշ Հարությունյանն ասաց, որ նախարարն իրենց ոչինչ չի խոստացել եւ իրենք այլեւս ոչ մի սպասելիք չունեն նախարարից:
«Նախարարը մեզ ասաց, որ միջպետական պարտքի շուրջ բանակցություններ են գնում, քացախաթթվի արտադրամասի, նաեւ «Կապույտ լիճ» տեղամասի խողովակաշարերից մեկի վաճառքից հետո հնարավոր կլինի պարտքի մարումը: Ես էլ առաջարկել եմ, որ բյուջեից հանեն այդ գումարը, մեզ վճարեն, հետո գույքի վաճառքից ստացած գումարը հետ վերադարձնեն բյուջե»,-ասաց Անուշ Հարությունյանը:
Նրա խոսքով՝ Զախարյանն իրենց պատասխանել է, որ դա իրենից կախված չէ, քաղաքական որոշում պետք է կայացվի:
Անուշ Հարությունյանը նախարարին ասել է, որ խնդրին լուծում չտրվելու դեպքում իրենք ծայրահեղ միջոցների կդիմեն, նախարարն էլ պատասխանել է, որ ինքը ոչինչ չի կարող անել:
«Մեր բոլորի պահանջները, որ նստացույց կանենք, ճանապարհ կփակենք, ծայրահեղ միջոցների կդիմենք, ամեն ինչ փոխանցել ենք: Մարդն ասել է, ոչինչ անել չեմ , այլեւս խնդիր չունենք, նա մեզ ասելիք չունի»,-ասաց Անուշ Հարությունյանը ՝ նշելով, որ իրենք շարունակելու են իրենց բողոքի ակցիաները:
Նրա խոսքով՝ իրենք այսօր կմնան այնքան ժամանակ ինչքան կդիմանան, իսկ հինգշաբթի կգնան Կառավարություն՝ վարչապետի հետ հանդիպելու պահանջով:
Նշենք, որ նաիրիտցիները պարտքերի մարման հստակ ժամանկացույց են պահանջում:
Հիշեցնենք, որ հարկադիր պարապուրդի մատնված՝ «Նաիրիտ» գործարանի աշխատակիցների՝ 18-24 ամսվա աշխատավարձերի պարտքը կազմում է մոտ 15 մլն դոլար: Նրանք բազմիցս հավաքվել են Կառավարության եւ նախագահականի մոտ՝ պահանջելով իրենց խնդիրների լուծում: