Երեւանի Բաղրամյան պողոտան արդեն 100 ժամ «պաշարման» մեջ է: Էլեկտրաէներգիայի սակագնի բարձրացման դեմ բողոքի ակցիայի մասնակիցները ուղիղ 4 օր առաջ երթով շարժվեցին դեպի Բաղրամյան պողոտա եւ մինչ օրս պահն այնտեղ նստացույց է ընթանում: (ֆոտոռեպորտաժ)
Այս պահին նորից Բաղրամյան պողոտան մարդաշատ է: Ոստիկանությունն արդեն երեք օր է ուժ կիրառելու փորձ չի անում:
Այս օրերի ընթացքում նստացույցը ինքնակազմակերպվել է, լուծվել են սննդի, հագուստի, աղբը մաքրելու խնդիրները: Այս պահին Բաղրամյան պողոտան կրկին մարդաշատ է, մարդկանց նորանոր խմբեր են մոտենում Բաղրամյան պողոտային: Օրվա ընթացքում ակցիայի վայր են այցելում հայտնի մարդիկ, դերասաններ, քաղաքական գործիչներ, մտավորականներ:
Նշենք, որ հունիսի 23-ին վաղ առավոտյան ցուցարարների նկատմամբ ոստիկանության կիրառած ուժից հետո մարդիկ կրկին հավաքվել եւ ավելի մեծ քանակությամբ շարունակում են նստացույցը Բաղրամյան պողոտայում։
Հիշեցնենք, որ չնայած էլեկտրաէներգիայի սակագնի բարձրացման դեմ ուղղված բազմաթիվ բողոք-ակցիաներին հունիսի 17-ին, ՀԾԿՀ հանձնաժողովի նիստում հաստատվել է էլեկտրաէներգիայի նոր սակագինը։ էլեկտրաէներգիան թանկացել է 6.93 դրամով՝ մեկ կՎտ/ժ-ի դիմաց 41.85 դրամից դառնալով 48.78 դրամ։ «Հայաստանի էլեկտրական ցանցեր» (ՀԷՑ) ընկերությունը առաջարկել էր էլեկտրաէներգիայի մեկ կիլովատտ/ժամը թանկացնել 17 դրամով: Քաղաքացիները հունիսի 22-ին երեկոյան 19:00-ից նստացույց են սկսել Բաղրամյան պողոտայում՝ պահանջելով անհապաղ կասեցնել էլեկտրաէներգիայի թանկացման վերաբերյալ հունիսի 17-ին Հանրային ծառայությունները կարգավորող հանձնաժողովի կայացրած որոշումը:
