Էլեկտրաէներգիայի սակագնի թանկացման դեմ պայքարող եւ օրեր շարունակ Բաղրամյան պողոտան փակած մի խումբ ցուցարարներ «Ոչ թալանին» նախաձեռնության որոշմամբ այժմ հավաք են անում Ազատության հրապարակում:

Ինչպես հայտնում է NEWS.am-ի թղթակիցը, ցուցարարներն այստեղ են տեղափոխվել անվտանգության նկատառումներից ելնելով, քանի որ քիչ առաջ ՀՀ ոստիկանապետ Վլադիմիր Գասպարյանը  հայտարարել էր, որ ոստիկանական մեթոդներով ցուցարարների կամքին հակառակ նրանց կհեռացնեն Բաղրամյան պողոտայից:

«Ես Բաղրամյանում վտանգ զգացի, բացի դա պետք է լինել կազմակերպիչների կողքին եւ որոշել հետագա անելիքները եւ խաղաղ մեթոդներով շարունակել պայքարը: Բաղրամյանում մնացել են միայն զոռբաները: Այնտեղ շուտով պատերազմ է սկսվելու»,- NEWS.am-ի հետ զրույցում ասաց ցուցարարներից մեկը:

«Ոչ թալանին» նախաձեռնության անդամ Վաղինակ Շուշանյանը ավելի վաղ կոչ էր արել Բաղրամյան պողոտայում հավաքվածներին գալ Ազատության հրապարակ եւ այն վերածել վրանային ավանի, քանի որ պայքարի տրամաբանությունը դա է հուշում։ Նա նաեւ նշել էր, թե Բաղրամյան պողոտայում սադրիչներ կան, որոնք իրենց քաղաքացիական պահանջը վերածել են քաղաքական պահանջի։

Ազատության հրապարակում գտնվող ցուցարարների մի խումբ էլ՝ Մաքսիմ Սարգսյանի գլխավորությամբ, ուղեւորվել է Բաղրամյան պողոտա՝ խոսելու ցուցարարների հետ։