ԱՄՆ-ի պաշտպանական գիտա-հետազոտական հեռանկարային մշակումների DARPA գործակալությունը հաղորդել է, որ իր աշխատակիցները սկսել են գենետիկորեն մոդիֆիկացված օրգանիզմներ (ԳՄՕ) ստեղծել, որոնք թույլ կտան Մարսը վերածել կյանքի գոյության համար պիտանի մոլորակի:
DARPA-ի գիտնականները երազում են Կարմիր մոլորակի վրա Երկրի նման մի բան ստեղծել՝ բարձրացնելով դրա ջերմաստիճանն ու մթնոլորտը հագեցնելով թթվածնով: Ներկայում նրանց գլխավոր նպատակն է ստեղծել ինքնատիպ բույսեր, ջրիմուռներ եւ մանրէներ, որոնք կկարողանան իրականացնել այդ խնդիրը:
Ըստ Informing-ի, գործակալության կենսաբանական տեխնոլոգիաների բաժնի ղեկավար Էլիշ Ջեքսոնը նշել է, որ այդ նպատակի համար օգտագործելու են DTA Gview ծրագիրը, որը «Google Maps գենոմ»-ների բազայից կընտրի լավագույն գեները:
Այդ կերպ ստացված օրգանիզմներն առաջին հերթին օգտագործվելու են այն վայրերի բնակեցման համար, որտեղ կյանքն անհետացել է տեխնածին կամ բնական աղետների հետեւանքով: Գիտնականների կարծիքով, այդ մշակումները կօգնեն կյանք ստեղծել նաեւ Մարսի վրա:
