Բելառուսի արտգործնախարար Վլադիմիր Մակեյը Հայաստանում ընթացող բողոքի ցույցերը համարում է այդ պետության ներքին գործը եւ վստահություն է հայտնում, որ Հայաստանի իշխանությունները կհարթեն ստեղծված իրավիճակը ժողովրդավարական ոգով։ Այս մասին նա հայտարարել է Մինսկում Արեւելյան գործընկերության ոչ ֆորմալ նախարարական երկխոսության 5-րդ փուլի ավարտին։
Հարցին, թե կարող է արդյոք ՀԱՊԿ-ը որեւէ կերպ ազդել Հայաստանում տիրող իրավիճակի վրա, Մակեյը պատասխանել է, որ այդ հարցը իր մոտ տարակուսանք է առաջացնում, իսկ Հայաստանում տիրող իրավիճակը պետք չէ դրամայի վերածել։ «Այո, կառավարությունը ցանկանում էր որոշ միջոցներ ձեռնարկել, որոնք առաջ բերեցին բնակչության դժգոհությունը»,-փոխանցում է TYT. By-ն։
«Բայց բոլորին շատ պարզ է, որ երկրի ղեկավարությունը պատրաստ է գնալ երկխոսության։ Եթե նրանք, ովքեր ցույցի են դուրս գալիս, չեն ընդունում դա, դա նրանց խնդիրն է։ Բայց ես վստահ եմ, որ իրավիճակը կհարթվի»,- հավելել է արտգործնախարարը եւ նշել, որ դա Հայաստանի ներքին գործն է։
«Ես հիմա հստակ չեմ կարող հիշել ՀԱՊԿ կանոնակարգի դրույթները, որոնց համաձայն՝ թույլատրվում է այս կամ այն երկրին ռազմական օգնություն ցուցաբերել, բայց ես կարծում եմ, որ այդ Կանոնակարգը սահմանում է, որ օգնությունը ցուցաբերվում է միայն արտաքին վտանգի եւ պետության կողմից համապատասխան խնդրանքի առկայության դեպքում»,-ասել է Մակեյը։
Իր հերթին ՀՀ արտգործնախարար Էդվարդ Նալբանդյանը հայտարարել է, որ էլեկտրաէներգիայի սակագնի բարձրացման դեմ բողոքին ի պատասխան՝ ՀՀ կառավարությունը որոշել է ընկերությունում անկախ աուդիտ անցկացնել։ «Աուդիտի ընթացքում կառավարությունն իր վրա է վերցնում սակագնի բարձրացման հետեւանքով առաջացած գումարի տարբերությունը»,- հայտարարել է Նալբանդյանը եւ նշել, որ Հայաստանում ժողովրդավարական գործընթացը շարունակվելու է, եւ մարդու իրավունքները պաշտպանվելու են։