Բաղրամյան պողոտայում այս պահին իրավիճակյը լարվել է։
Ինչպես հայտնում է NEWS.am-ի թղթակիցը, ընդդեմ էլեկտրաէներգիայի թանկացման բողոքի ակցիայի մասնակիցներին ոստիկանությունն արգելել է բարձրախոսներ տեղադրել։ Ինչից հետո վեճ է ծագել։
Տարածքում ոստիկանների թիվն աճել է, իրավապահները մի քանի մետր առաջ են եկել եւ արգելապատնեշ կազմել։ Այստեղ է գտնվում նաեւ ՀՀ փոխոստիկանապետ Հունան Պողոսյանը, որը կոչ էր անում ցուցարարներին՝ իրենց շարքերից հանել սադրիչներին։
Երեւանի փոխոստիկանապետ Վալերի Օսիպյանը մի խումը «հրեշտակների» ուղեկցությամբ փորձում է մոտենալ տեղադրված բարձրախոսներին եւ առգրավել դրանք, սակայն ցուցարարները մեծ շարք են կազմել եւ թույլ չեն տալիս մոտենալ։ «Հեռացեք, հեռացեք», վանկարկում են ցուցարարները։
Ցուցարարներն իրենց հերթին ոստիկաններին մեղադրում են սադրանքներ հրահրելու մեջ։ Նրանց հաջողվել է պահպանել ձայնային սարքավորումները։
Հիշեցնենք, որ հունիսի 22-ից Բաղրամյան պողոտայում բողոքի ակցիա է ընթանում ընդդեմ էլեկտրաէներգիայի սակագնի բարձրացման։ Հունիսի 23-ի առավոտյան ոստիկանությունը ուժով ցրել էր նստացույցը, բերման ենթարկել 237 մարդու, բայց երեկոյան բողոքի ակցիան վերսկսվել էր։ Հունիսի 27-ին Սերժ Սարգսյանի ելույթից հետո նախաձեռնող խմբի կազմում տարաձայնություններ էին առաջացել, եւ հաջորդ օրը ցուցարարների մի մասը հեռացել էր Ազատության հրապարակ, իսկ մեծ մասը մնացել էր Բաղրամյան պողոտայում, որտեղ մինչ այժմ շարունակվում է բողոքի ակցիան։
Հիշեցնենք, որ չնայած էլեկտրաէներգիայի սակագնի բարձրացման դեմ ուղղված բազմաթիվ բողոք-ակցիաներին հունիսի 17-ին, ՀԾԿՀ հանձնաժողովի նիստում հաստատվել է էլեկտրաէներգիայի նոր սակագինը։ էլեկտրաէներգիան թանկացել է 6.93 դրամով՝ մեկ կՎտ/ժ-ի դիմաց 41.85 դրամից դառնալով 48.78 դրամ։ «Հայաստանի էլեկտրական ցանցեր» (ՀԷՑ) ընկերությունը առաջարկել էր էլեկտրաէներգիայի մեկ կիլովատտ/ժամը թանկացնել 17 դրամով:
