Բաղրամյան պողոտայում այս պահին իրավիճակը հանդարտվել է, ոստիկանները հետ են քաշել իրենց ուժերի մեծ մասը, իսկ ցուցարարները պարում կամ հանրային քննարկումներ են անում։
Ինչպես հայտնում է NEWS.am-ի թղթակիցը, ընդդեմ էլեկտրաէներգիայի թանկացման բողոքի ակցիայի մասնակիցներին ոստիկանությունն արգելում էր բարձրախոսներ տեղադրել, բայց վերջիններս կարողացան պահել ձայնային սարքավորումները։
ՀՀ փոխոստիկանապետ Հունան Պողոսյանն ու Երեւանի փոխոստիկանապետ Վալերի Օսիպյանը մի խումբ «հրեշտակների» ուղեկցությամբ փորձում էին մոտենալ տեղադրված բարձրախոսներին եւ առգրավել դրանք, սակայն ցուցարարները մեծ շարք էին կազմել եւ թույլ չեն տալիս մոտենալ։
Ոստիկանները հեռացան նստացույցի վայրից, հետ քաշեցին իրենց ուժերի մեծ մասին, ինչից հետո իրավիճակի լարվածությունն անցավ։
Հիշեցնենք, որ հունիսի 22-ից Բաղրամյան պողոտայում բողոքի ակցիա է ընթանում ընդդեմ էլեկտրաէներգիայի սակագնի բարձրացման։ Հունիսի 23-ի առավոտյան ոստիկանությունը ուժով ցրել էր նստացույցը, բերման ենթարկել 237 մարդու, բայց երեկոյան բողոքի ակցիան վերսկսվել էր։ Հունիսի 27-ին Սերժ Սարգսյանի ելույթից հետո նախաձեռնող խմբի կազմում տարաձայնություններ էին առաջացել, եւ հաջորդ օրը ցուցարարների մի մասը հեռացել էր Ազատության հրապարակ, իսկ մեծ մասը մնացել էր Բաղրամյան պողոտայում, որտեղ մինչ այժմ շարունակվում է բողոքի ակցիան։ Ազատության պողոտայում նստացույց անողները հաջորդ օրը հեռացան, մի մասն էլ կրկին միացավ Բաղրամյան պողոտայի ակցիային։
Հիշեցնենք, որ չնայած էլեկտրաէներգիայի սակագնի բարձրացման դեմ ուղղված բազմաթիվ բողոք-ակցիաներին հունիսի 17-ին, ՀԾԿՀ հանձնաժողովի նիստում հաստատվել է էլեկտրաէներգիայի նոր սակագինը։ էլեկտրաէներգիան թանկացել է 6.93 դրամով՝ մեկ կՎտ/ժ-ի դիմաց 41.85 դրամից դառնալով 48.78 դրամ։ «Հայաստանի էլեկտրական ցանցեր» (ՀԷՑ) ընկերությունը առաջարկել էր էլեկտրաէներգիայի մեկ կիլովատտ/ժամը թանկացնել 17 դրամով:
