Բաղրամյան պողոտայում ընդդեմ էլեկտրաէներգիայի թանկացման ցույցի մասնակիցները նոր նախաձեռնող խումբ են ստեղծել, որը համակարգելու է մյուս խմբերի աշխատանքը նստացույցի վայրում։ Այդ մասին հայտնել է ցուցարարներից Նարեկ Այվազյանը՝ նշելով, որ 10 հոգանոց խմբեր են ստեղծվել, որոնցից յուրաքանչյուրը մեկական ներկայացուցիչ ունի նոր նախաձեռնող խմբում։
Մասնավորապես, ստեղծվել են արագ արձագանքման, հասարակական կարգի պահպանման, տեխնիկական խնդիրների, հասարակայնության հետ աշխատող, իրավաբանական եւ ֆինանսատնտեսական խմբեր։ Կարող են ստեղծվել նոր խմբեր, որոնցից յուրաքանչյուրը մեկական անդամ կունենա նախաձեռնող խմբում։
Վերջինիս կազմում ընդգրկվել են Նարեկ Այվազյանը, Բաբկեն Տեր-Գրիգորյանը, Դավիթ Սանասարյանը, Հունան Կնյազյանը, Հովիկ Ենոքյանը, Արթուր Հարությունյանը, Արմեն Հայրապետյանը, Պավել Գրիգորյանը, Հմայակ Մկրտչյանը, Վահագն Լեւոնյանը, Դավիթ Սահակյանը, Արա Շահվերդյանը եւ Դավիթ Հովհաննիսյանը։
Նարեկ Այվազյանը նշեց, որ խմբում հիմնականում բոլորը տղաներ են, սակայն դա դիտավորյալ չի ստացվել, եւ առաջիկայում կփորձեն համալրել աղջիկներով։
Այս պահին իրավիճակը Բաղրամյան պողոտայում հանգիստ է, երաժշտությունն անջատված է, եւ ցուցարարները ինտելեկտուալ խաղեր են խաղում, երգում, քննարկումներ անում։
Հիշեցնենք, որ հունիսի 22-ից Բաղրամյան պողոտայում բողոքի ակցիա է ընթանում ընդդեմ էլեկտրաէներգիայի սակագնի բարձրացման։ Հունիսի 23-ի առավոտյան ոստիկանությունը ուժով ցրել էր նստացույցը, բերման ենթարկել 237 մարդու, բայց երեկոյան բողոքի ակցիան վերսկսվել էր։ Հունիսի 27-ին Սերժ Սարգսյանի ելույթից հետո նախաձեռնող խմբի կազմում տարաձայնություններ էին առաջացել, եւ հաջորդ օրը ցուցարարների մի մասը հեռացել էր Ազատության հրապարակ, իսկ մեծ մասը մնացել էր Բաղրամյան պողոտայում, որտեղ մինչ այժմ շարունակվում է բողոքի ակցիան։
Հիշեցնենք, որ չնայած էլեկտրաէներգիայի սակագնի բարձրացման դեմ ուղղված բազմաթիվ բողոք-ակցիաներին հունիսի 17-ին, ՀԾԿՀ հանձնաժողովի նիստում հաստատվել է էլեկտրաէներգիայի նոր սակագինը։ էլեկտրաէներգիան թանկացել է 6.93 դրամով՝ մեկ կՎտ/ժ-ի դիմաց 41.85 դրամից դառնալով 48.78 դրամ։ «Հայաստանի էլեկտրական ցանցեր» (ՀԷՑ) ընկերությունը առաջարկել էր էլեկտրաէներգիայի մեկ կիլովատտ/ժամը թանկացնել 17 դրամով: