ՄԱԿ-ի Ստամբուլյան արձանագրության՝ խոշտանգումների եւ այլ դաժան, անմարդկային կամ արժանապատվությունը նվաստացնող վերաբերմունքի կամ պատժի մասով արդյունավետ քննության իրականացման եւ փաստաթղթավորման մասին ձեռնարկի հեղինակներից մեկը գտնվում է Երեւանում՝ պետական եւ մասնավոր ոլորտի ավելի քան 30 մասնագետների համար անցկացնելու դասընթաց:
«Մենք շատ ոգեւորված ենք Երեւանում տեսնելով Ստամբուլյան արձանագրության հեղինակներից մեկին` միջազգային դատաբժշկական փորձագետ Օնդեր Օզկալիպսին եւ մյուս միջազգային հայտնի փորձագետներին, որոնք Երեւան են ժամանել ուսուցանելու խոշտանգումների դեմ պայքարելու վերաբերյալ հիմունքները,- ասաց ԸԻԿ գրասենյակի տնօրենը եւ դասընթացի համակարգողներից մեկը` Քրիստինա Գեւորգյանը:
«Սա կարող է շրջադարձային կետ դառնալ տարածաշրջանում արմատախիլ անելու խոշտանգումները եւ վատ վերաբերմունքի երեւույթը եւ մեծ օգնություն դառնա մեր ընթացիկ աշխատանքների համար»,-ասել է նա:
Դասընթացն անցկացվեց Երեւանի «Դը Սայն» հյուրանոցում, որը համատեղ կազմակերպվել էր ԸԻԿ-ի եւ Խոշտանգումների զոհերի վերականգնողական կենտրոնի («Էմփաթիա», Վրաստան) կազմակերպությունների կողմից՝ ԵՄ կողմից հովանավորվող «Կովկասյան Հակա-խոշտանգումների ցանց. Բազմա-վերականգնողական ծառայություններ խոշտանգումների զոհերի համար եւ անպատժելիության դեմ պայքար» ծրագրի շրջանակներում:
Միջոցառմանը մասնակցել են դատական բժիշկներ, հոգեբույժներ, հոգեբաններ եւ իրավաբաններ, բռնությունների կանխարգելման ազգային մեխանիզմի եւ հասարակական դիտորդական խմբերի եւ հասարակական կազմակերպությունների ներկայացուցիչներ: Նրանց համար անցկացվեցին տարբեր ուսուցումներ եւ պրակտիկ աշխատանքներ՝ փոխանցելով խոշտանգումների դեպքերն արձանագրելու եւ պատշաճ բժշկաիրավական հաշվետվություններ կազմելու հմտությունները:
Միջոցառմանը հրավիրված էին փորձագետներ` Մարիամ Ջիշկարիանին, բժիշկ-հոգեբույժ, ՀՎԿԽ/«ԷՄՓԱԹԻԱ», Վրաստան; Ջեյմս Լին, իրավաբան` IRCT; դոկտոր Օնդեր Օզկալիպսին, միջազգային դատաբժշկական փորձագետ; Ջորջ Բերուլավան, փորձա-գետ/հոգեբույժ, ՀՎԿԽ/«ԷՄՓԱԹԻԱ», Վրաստան; իրավաբաններ` Օթարի Կվաչաձեն եւ Նաթիա Իմնաձեն, ՀՎԿԽ/«ԷՄՓԱԹԻԱ»:
Դասընթացը հաջորդեց ՄԱԿ-ի կոնվենցիայով հռչակված խոշտանգումների զոհերի աջակցության միջազգային օրվան` հունիսի 26-ին նվիրված միջոցառմանը, որտեղ դատապարտվել էր 2015 թվականի հունիսի 23-ին Բաղրամյան պողոտայում խաղաղ նստացույցի մասնակիցների նկատմամբ Ոստիկանության կողմից իրականացված անօրինական գործողությունները:
«Մենք դեռ երկար ճանապարհ ունենք խոշտանգումները բացառելու նպատակին հասնելու համար,- ասաց ԸԻԿ նախագահ Միքայել Արամյանը,- սակայն այսօրվանից ավելի հարմար պահ չկա՝ հանցագործներին արդարադատության առջեւ կանգնեցնելու համար»: